گالــت ام عـباس والـدمعه جـريه         مـنهي زيـنب بـينكم يـااهل العزيه
سـومَـرَت لـوجـوه مـتـغيره عـليه         چنَّــه غـيـركم طـريگ الـبيد لگفـر

جـاوبـتـها وأشـــرت لـيـها تـعـالي         أنـي زيـنب مـن بـعد ديك الغوالي
الـمـصايب لـعـبت ابـعزي ودلالـي         والـدهر بعد اخوتي الطيبين أكشر

ضجت النسوان من سمعت حچيها         وگامـت ام الاربـعه تـخفف عـليها
وسـكتت وضمتها بس تسمع بچيها         والـثگيـل اونـيـنها لـلـصخر فـسّـر

گالـــت ام لـعـزاز يـابـت الـزچيـة         سـولفيلي اشصار بارض الغاضرية
هـم صـحيح حسين ضل جثه رميه         لـيش ماشالوه عاري بوسطة البر

ردت الـحوره نـعم بـعيوني شـفته         طـولـه مـتوذر وذر مـوبيدي عـفته
حـسين مـاينشال لـو ينشال شلته         وزعـته الاعـوجية وجـسمه طـشر

گالـت ام لـعزاز والـمدمع اتـحدره         مـن گبـل مـاحزو العطشان نحره
لـيش مـارووه مـن لـفرات گطره         مـعفر بـوگت الظهيره بشدة الحر