إنت ابمنازل تستقر وانه بلبرور=وبمولدك راح انذبح يهلال عاشور خبّرني عن ضيعة حرم لحسين يهلال=گلّي صدگ بنت النبي تركب على اجمال من دون حاميها وحيدة ويّة لطفال=بس هالعليل إلهم وتدري وينه أوّين خبّرني چيف الحال لمّن شالت الكور=تنظر ابو فاضل على المسنات معفور و الراس اظل مرفوع بين الخلگ مشهور=هالوگت تدري وين متوزّع الجفين؟! خبّرني بالنسوان من شافت المظلوم=متوسّد التربان متغسّل ابلدموم ومنّه الگلب منزوع بمثلثٍ ميشوم=ما وحدة فوگ الولي خرّت بليدين ضيعة حرم لحسين يالتسألني عنها=ماشافت اعيوني حرم أضيع امّنها اوزينب بعد عزها الشمر يحدي ضعنها=والحامي ورّثها لستر الوجه چفّين لطفال هامت بالفلا من هجمت الخيل=اوزينب تدوّرهم اوترجع يم لعيل والنار تلهب في گلبها اولحگت الذيل=والحرم منظرها صعب ماتفهمه العين اولمّن طلع وجه الصبح مظلم بلا نور=دنّوا الهوازل حگ حراير مالها استور ابضرب اوشماتة زلزلت وجدان لبرور=اوحرمان من توديع أبوفاضل ولحسين