هالعام حجي للشاعر: علي إبراهيم الكرّاني هالعام حجي قرّره رب البريّة=عندي مناسك خاصة بالغاضريّة حجّاجي كلهم بالمناسك عدهم اعلوم=نيّتهم القربى و غسلهم نزف لدموم و نزع المخيط امفارﮒ الأرواح لجسوم=و عن حجر لسود راح ايقَبلون المنيّة ما شافت الدنيا مثل حجّاج لطفوف=للمعركة يسعون بين ارماح و سيوف و تﮕصير هذا ﮔطع راسه و ذاك لﭼفوف=و التلبيّة لبّيك يا روح الزﭼيّة لبيك أللهمّ لبيك ابنجيعي=و بﮕطع راسي و سهم في مهجة رضيعي لبّاك ضلع امّي و تلبّي لك اضلوعي=و راضي ابمبيتي تحت حافر الأعوجيّة و عبّاس و الأكبر و جاسم و الميامين=ابعاشر أقدّمهم على حبّك قرابين و لعيال ايتّمها و ارمّل هالنساوين=و خلها لجل عينك تروح اختي سبيّة و زينب سعيها يختلف عن ساير الناس=عدها الصفا لحسين و اما المروة عبّاس و المروة راسه منفضخ و الصفا ابلا راس=و كلما اتهرول طاردتها خيل اميّة عاشر الحجة ايصادفه عاشر محرّم=و غسلي لعيد الحج أبغتسله من الدم و مجلسي يوم العيد راح ايصير ماتم=و عند الظهر يصعد على صدري دعيّة حجاج وادي كربله دون البرايا=عافوا اثياب العيد و امتدوا عرايا و لعيالهم نزف الدما أغلى هدايا=و آنه هديّة عيدي راسي حﮓ رقيّة ابعاشر محرم تنﮕضي حجة الإسلام=بجساد تتعفّر صريعة و حرﮔة اخيام و روس و سبايا تنأخد للكوفة و الشام=ﮔدامها راسي ابراس السمهريّة