يوم الرحيل للشاعر: علي إبراهيم الكرّاني في يوم الرحيل حسين وﮔف يتأمّل أضعانه=ينادي يا رباب الزوم عبدالله يجي اويانه راحت للعليلة اتصيح أمّه يا ضوى اعيوني=يعبد الله تعال اوياي أسليك او تسليني ما أﮔدر على فرﮔاك يبني الفرﮔة تﭼويني=رفض عبدالله حضن امه او كان الصمت برهانه او زينب لفت تحﭼي يمهجة مهجتي و حشاي=أني العمّة يروحي وين راحت ضحكتك ويّاي مثل امك أني ربّيت يبني لو نسيت ارباي=رادت تحمله العمة او ظل الطفل بمكانه لفت إخته الحبيبة اتصيح يعبد الله أني سكنة=تعال ابحجري مثل اول أسكّت منّك الونة تعال اوياي للمظلوم نخفّف كل حزن عنّه=عبدالله مرد اجواب او ردّت عنه حزنانة من شاف الأخو ابهالحال لكبر نزل عن مهره=او قسم عالطفل بالمختار والكرار والزهرة او باللطمة او بالأضلاع او بالمحسن او بالعصرة=عبدالله صمت و حسين علت ضجّات نسوانه او نزل عبّاس عن مهره يريد المشكلة ايحلها=ينادي يا رضيع حسين أنا هالسفرة كافلها تعال او لا تخاف اعداك لو هجمت أجدّلها=سكت عبدالله و العيلة من موقفه حيرانه بعد عباس راح حسين متوجه لعند ابنه=او ﮔرّب ثغره الطاهر او همس للطفل في إذنه يﮕله عمّك المحسن ينطرك يبني بالجنّة=و الزهرة يبعد الروح حﮓ شوفتك ولهانه أريدك يبني عبدالله تماثل محسن ابن امي=و تتوسد على صدري و انا فوﮒ الترب مرمي بعد ما اتدوس يبني الخيل جسمك بالثرى او جسمي=او دمّك يقبله الباري او يغمرنا ابرضوانه جدّك يبني واعدني ابثلاث اسهام في عاشور=سهم امثلّث ابنحرك يوﮔع و الدموم اتفور و سهم ابعين ابو فاضل يخليني ابظهر مكسور=و ابوك ابسهم مثل النار يوﮔع من على احصانه و اذا ودّك ذكر لسلام يبﮕى يا بعد عمري=لازم دمّك و دمي على حر الثرى يجري و راسك ينﮕطع مثلي و يرضونك على صدري=و راسي و راسك ايروحون إلى الظالم ابديوانه أنا امن المصطفى يبني و المصطفى من لحسين=و الدين انوجد منه او من دمي بيبﮕى الدين إلى الرحمن لينا اديون خلنا انوفّي منها دين=تراه ابدمّك او دمي يثبت دينه و اركانه بس ما سمع عبدالله كلام الوالد المهموم=ابزفراته ترك إخته او طوّﮒ رﮔبة المظلوم حضن إبنه أبو السجاد او على خده الدمع مسجوم=او نادى ارجاله و النسوان للطف حان ممشانه