(مبلّل بنيّة رجعتك)

منين ما لمّك يفز بيدي النده وأشهگ قصيده ..
وأشتعل بعيون ليلي نجوم
ويكاسرني صفنه بلا وجه
وأزحف مثل سرب الدموع العاشرن سچه بعيده ..

وأصحه والگاني ويه وحدي
مبلّل بنيّة رجعتك !!

بوحشة جروحي المحطات اصطفاف
أطفال مملوحه بحسرتي
الذكريات :
أطوف بيه ويصعد ويه أنفاس شوگي الياسمين ..
يمرجح ضلوعي بدرب يصهل حنين ..

وأنتظر
وأعمى النهار ..
لا عثر مره بونيني
ولا فتح لظنوني شباچه
وتوضيت بضحكته
ولا ترست جيوب حزني من السمار ...

الخضّر بذاكرة روحي حروف وجهك
وحدي واتبده اعله كيفي
الگاع تشربني قصايد
وأكبر بهيبة سنابل ..
وانتظر
ريحك يمرني
بغبشه وي أول دعاء يكحّل رموش البلابل ..

شايل الرعشه مسافه
بطول ليل فراگك اليتّم صفنتي ..
ومن يچتّف صبري ويساهر عذابي
وتحرس طيوفك لهفتي ..

وآنه شمعه محجّله بواهس خريف ..
ولا رصيف ..
يعبّر أيامي على متونه هوامش

2010م