الحسين في وداع قبر أمه الزهراء (ع) للشاعر: سلمان جمعة الكرّاني (الفائزي نبطي) مشتاﮒ أشوفﭻ ﮔبل أرحل يا زﭼيّة=أقسم عليﭻ ابضلعﭻ اتردي عليّه يمه مثل حالي أبد ما صار أي حال=مطرود من طيبة أو عندي حرم و اطفال و اشوف بيّن في سما الأهوال لهلال=ليتﭻ تشوفي اهلال ذبحي ابهالمسيّة واﮔف على ﮔبرﭺ أوهمي واﮔف اوياي=تعبان من جور الدهر ما غفت عيناي ضميني ابحضنﭻ ﮔبل تذبحني اعداي=آنه العزيز او دارت اعليّه الدنيّة ماشي ابطريﮓ الموت او هذا آخر اوداع=يمه بمان الله يمكسورة الأضلاع والله أحس روحي تنازع مني انزاع=وين المدينة او وين أرض الغاضريّة طالع اوعندﭺ فاطمة بنتي وديعة=فوﮒ المرض ما تحتمل ضيم و فجيعة مكسور خاطرها أو محنتها فظيعة=أهون عليّه الموت من تنظر إليّه يم الحسن ما زلزل أركاني اوفتني=درب المنيّة او بالذبح جدي وعدني فرﮔاﭺ ﮔبل الشمر يا يمة ذبحني=اتمنيت عد ﮔبرﭺ توافيني المنيّة باسايلﭻ يمة و اريدﭺ تعذريني=في يوم عاشر بالعطش من يذبحوني منهو يغمض يمه عند الموت عيني=و منهو يرد الخيل لو داست عليّه يمه غريب او لا غسل ليّه ولا اﭼفان=عطشان تذبحني العدا يا يمه عطشان جسمي على الغبرة أو راسي فوﮒ لسنان=و اعظم مصيبة تنأخذ زينب سبيّة