إحــذر إحــذر مــن دنـياك         غـداره ومـا تـوفي اويـاك
إبــــــعـــــد عــــنــــهـــا         واحــــــــــذر مــــنـــهـــا

أهـــل الأمـثـال ايگولـوهـا         حـكـمه وتـهـدف لـلاصلاح
لا تـشغل فكرك بالماضي         والـمـاضـي اتـعـدّاك وراح
فــكّـر بـالأمـه وحـاضـرها         وشوف المستقبل يا صاح
الليل اشما طالت ساعاته         لابـــد يـنـشاف الـمـصباح
ديـــنــك عــالــواقـع دلاّك         لا تــنــغـش بــهــذا وذاك
أهــــــــــل الـــمــنــكــر         مــــنـــهـــا اتـــــحـــــذر

إتــرك هـالـدنيه الـخـداعه         چلـمه وگلـناها من اسنين
هـاي الـدنيه اويا من وفّت         حـتى اتـوفي اويه الطيبين
بـالـك تـنـغش ابـضـاهرها         وبالك تمشي اعله الحبلين
والـما يسلك درب الطاعه         لا دنـيـه ايـنـول او لا ديـن
يـــا مـــا گلــنـه ونـبـهناك         تـمشي اعله الواقع ردناك
الـــدنـــيـــه اتــــخــــادع         هـــــــــــذا الـــــواقـــــع

اسـمع هالحكمه المعروفه         حـكـمه وظـلـت بـالأذهان
تـشـرحلك أوضـاع الـعالم         هـالعالم كـل يـوم ابـشان
لو ردت المضمون الواضح         اسـمـع شــيگول الـقـرآن
بالخسران اصحاب الباطل         والــفـوز لأهـــل الايـمـان
خــلّـي الايـمـان ابـيـمناك         وعـيـون الـخـالق تـرعـاك
اخـــــــــذ الـــحـــاصـــل         أهــــــــــل الـــبـــاطـــل

يـالمسلم ديـنك يـشرحلك         وايـبـيـن هـــذا الـمـفـهوم
الـمن دامـت هـاي الـدنيه         حـتى اتـريد اويـاك اتـدوم
هـذا حـسين وهاي اهدافه         اسـمع شـيگول الـمظلوم
اتـمسَّك بالدين ولا تغصب         حــق الـبـائس والـمحروم
يـالـمسلم ابــذل مـسعاك         بـالـك تـتـبع مَــنْ اغــواك
الـــــــــــزم ديـــــنـــــك         هـــــــــاي اســـنــيــنــك

إحــذر واتـجـنَّب هـالـوادم         بــالـك بـالـمظهر تـغـريك
وأكـثر مـنهم، إحـذر مـنك         نـفسك مـو ويـاك، اعـليك
حـتى الـذات الـلي تحملها         لابـــد يــوم وتـغـدر بـيـك
مـا مثل حسين ابها العالم         يــهـديـلـك دم ويــهــديـك
انـطاك الدم وروح انطاك         رادك مـا تـحرف مـسراك
واصــــحــــاب الــــشـــر         مــــــــــــا تـــتـــغـــيَّـــر

ضحه حسين بكل ما يملك         اخــــوه وأولاده وانــصـار
ولـمـن قـدم دمـه الـغالي         وضَّـــح مـفـهوم الأحــرار
رادك يـالـمـسـلم تـتـفـهَّم         مـعنى الـحب معنى الايثار
عــزه وذلــه بـهاي الـدنيه         يــا مـطـلب مـنـهن تـختار
صـوت الـدم صـاح وناداك         بــالـك تـسـتسلم لـعـداك
تــــخـــضـــع الـــــمــــن         مــــــــــــا تــــتــــأمَّـــن

حب حسين ايعيش ابدمنه         نـحـيا اويـاه انـموت اويـاه
عـفنه الـدنيه وكـل ما بيها         لـجـل حـسين ومـا عـفناه
بـــالأرواح يـعـيش اويـانـه         وكــل عـام انـجدد ذكـراه
انـجـدد عـهـده ومـا نـتغيَّر         نـمـشي ابـدربه وعـاهدناه
مـهما نـصبوا مـن أشـراك         نمشي ونسحگ عالأشواك
اشــــلــــون نـــعـــوفــه         مـــــثـــــل الـــكـــوفـــه

مـنعوف حـسين ولا نـترك         مــهــمـا تــنــدار الأيــــام
مـظلوم ومـا ننسه مصابه         ومــصـابـه هــمــوم وآلام
مـا تـنشف دمعتنه التجري         واتـواسـي دمــوع الأيـتـام
نــذكـر أيـتـامه الـسـلبوها         ومــا خـلّـوا لـلـعيله خـيام
صـوت الـعيله يصيح هناك         يـالمخضوب بـفيض ادماك
هــــــــــاي الــــــــــوادم         ويــــــــــه الــــظـــالـــم