الحسين يودّع فاطمة الصغرى وقفت اقبال حسين تنحب طفلة حسين=اتقلّه العطَش ضرني يبويَ والقصد وين الله يَبو السجّاد ما تعطف عليّه=فَتّ العطَش قلبي و دَنَت منّي المنيّه وَصِّل الشّاطي وجيب لي قطرة اميّه=وعاين يبويه اطفالنا من العطش ميتين قلها يَفاطم بالبجا نحّلتي قواي=قعدي يَبويه بالخبا و انا اطلب الماي بالله يَزينب سكّتيها مهجة احشاي=قلبي تراهو من حجيها صار شطرين صاحت يبويه وين قصدك عنّي اتروح=ياياب قلبي امن العَطش و الحزن مجروح ويّاك اخذني للنّهر ما بقت لي روح=العطش فَت اقلوبها كلها النّساوين قلها يبنتي للحريبه اشلون أودّيك=و بالمعركه يا نور عيني من يباريك و تالي للمخيّم يبويه من يرد بيك=لو طحت ويّا مَن للمخيّم تردّين تقلّه يبويه وياك اروحن و ارجع اوياك=للنّهر وصّلني يَتَاج الفَخَر بحْماك قلها ينور العين ما أرجع من هناك=أعتاق انا وانتي يشمّامه تضيعين اببّاب الخبا قعدي يبويه وارقبيني=و انجان ما حال القضا بينج وبيني الماي أجيبه و بالنّحب لا تشعبيني=قعدت الطّفله وراح عنها المعركه حسين طالت المدّه و اليتيمه ظلّت اتجود=يَمّ الوديعه والدّمع يجري بلخدود تقلها بعد يَمْتَى يَعمّه والدي يعود=فَتّ العَطش قلبي وقَلْ شوفي من العين ساعه ولن المهر جا يسحب شكيمه=والسّرج مايل حيف ويصيح الظليمه وفرّن من الخيمه الحرم وامّا اليتيمه=عْلَى الوجه خرّت تلطم الهامه باليدين