جسّام جسّام .. آ يبني يجسّام
بعدك شنهي أحوالي .. حاشى تغيب عن بالي
آ يبني يجسّام
يبني آنه أمك يا نظر عيني
اقعد أرد أكلمك وانته حاجيني
بعدك يا نفس أفراحي تدريني
ظُلمت دنيتي وتبدّت سنيني
مر عام مر عام .. من بعدتنا الأيّام
ظنيتك ترد سالم .. وانته اعله النهر نايم
آ يبني يجسّام
بعرصه كربلا ينرسم هالمنظر
من وحده بقى حاير أبو الأكبر
يصرخ ماكو ناصر يفزع ويحضر
ماشفتك يجاسم لحظة تتعذّر
تنلام تنلام ؟ .. يبني حاشى تنلام
وفّيت الوعد يبني .. يالفرقاك شيبني
آ يبني يجسّام
يبني ومن رحت للحومة متعني
ظنّي جان تسلم واقطعت ظني
حال الفاقدة لو ناشدت عني
يوليدي بغيابك ميته جني
أنضام أنضام .. وتترادوني لسهام
سهم الفقد حيرني .. والثاني بألم مرني
آ يبني يجسّام
يبني الصوبك ما صوبك وحدك
صاب سنين عمري من كتب لحدك
روحي ودنيتي كلها بقت عندك
يالغالي ودليلي ينفجع بعدك
أحلام أحلام .. ريت الصار أحلام
ريت الموت ماخذني .. وما ماخذ عمر ابني
آ يبني يجسّام
يا يمه تودعني ابصغر سنك
وتمشي للمنية ويعتلي ونك
تمنيت أفرح ابأولادي المنّك
ومتخليني وحدي وتغمضه جفنك
ما دام مادام .. عرسك يبني مادام
عفت العرس والحنّه .. يبني ورحت للجنّه
آ يبني يجسّام