تعلمنه الصبُرْ مايومْ بَابَه نرده ونسِّده عَلمنَا الزِمَان انضوگ مُرَّه ومايهم شَهْدَه رُبَيْنَا ويا الصَبُرْ توم ومَهدنا يجاور لمهْدَه لَحَدْ مَا هَالْزِمَان اعْتَرف احنه بطوله وبْگَدَّه لاحظ كِلْ وجه شيعي تلگه صروفه بخَدَّه ولو تِكْشِفْ گلُبنا انچَانْ تشوف من القهر نَدَّه أخذنا الصَبُر مِنكم سيِّدي القائم ومَنْهِدَّه لگيناكُم جِبَل شامخ وكِلْ عاصف يرِدْ مَدَّه ولافَيْضَانْ يُعْبُرْ صوبكم ويمر بَعَدْ بَعْدَه وتِرْتَد السيول التعرف انتوا المانع وسَدَّه شِلْنَاكُمْ وسط العيون اوجِفِنَّه اعليكم انسِدَّه وعَين الما تظمْكُم سيِّدي تِتْعَامَه لو رَمْدَه وگلب المَايودكُمْ موگلبْ ومن الصَدِر طُرْدَه گَلُبْنَا بعالم المِيثَاق عَاهد والتِزَمْ عَهْدَه وحَگَّك سيِّدي نُرْفُضْ گَلُبْ مايوفِي بوعْدَه لِذلك بالبشِّدايد نُگْصدك ولنَبْعَك انوِرْدَه بس هاليوم صُعْبَتْ والصَبُر متوازي يَمْ حَدَّه صُبَحْنا اليوم مَضْرَب للسِّيوف امْنِ الفُگَد رُشده صِرْنا نگوم مِنْ شِدَّه ونُوگَعْ سيِّدي بشدَّه ودوم نگُول مَيخَالِفْ لابُد تِنتهي العِدَّه شِيعَة حيدره من زمَان عَالشِّدات مِتْعودَه شِيعة حيدره أخذت وِسَام الأصل والجُوده يتْكَالَب علينا اليوم يزيد العصر وَيْ جُنْده والحاقد يحضنه ويسْنِدَه يحميه ويأيدَه چَاْ لِشْوَكِتْ نبگه سيِّدي هَمْ نُطْلُب لوِدَّه طَالَتْ غَيبتك يَايومْ گَلب العَاشِگ اتْبَرْدَه طالت سيِّدي القائم يَمْته الواگعْ اتْسِنْدَه يَمته يَانظر عيني تِمِد ايدينك ليَدَّه أگُلَّك سيِّدي خَايف ماي الصَبُر يتْبَدَّه أگُلَّك سيِّدي صار الدُعَه بدعه شِرِكْ عقدَه أگُلَّك سيِّدي اصْبَحْ كُفر عالتُربَه السَجْدَّه اگُلَّك هَالْعِدا حتى اللسان ترُبْطَه وتْقَيْدَه تِدري سيدي امن الحَقْ تِخَاف اميَّه وتْصِدَّه جَدَّك مِنْ رُفَض لِلْذِّل ظَلْ لانَاصِر اوحَدَه والتَارِيخ كُلْ فتره يعيد حسين ويرِدَّه ويرجع مِنْ جِدِيد يزيدْ يِگْطَعْ نَحْرَه ابْحِقْدَه وچَمْ جَعْده تِدِّس السم وچَبد المجتبى اتْمُرْدَه بَسْ يَبن الحَسن هَاليوم ألْف يزيد ألف جَعْدَه كِلهَا اتكَالِبت عَالشيعه تِهْدِم بيتنا اتْهِدَّه بكل فتره صلف جاهل تبع شيطان هَمْ عَبْدَه يكَفُّرنَه ورُبت مِنْ خَير ارضنا عياله اولْدَه ليَمته سيِّدي يُبگه حُسامَك نَايم بغُمْدَه يمته سيِّدي قائم يمينك ينهي هالشِدَّه گِلِّي بيَاوَكِتْ مَانِلگَه شُوك ونلگه بَسْ وَرْدَه