أتغزل بجرحي وحقي ماأنلام
مامرني فرح وك بيش أتغزل
غير جروح فﮕدك ياملاذ الروح
ماعندي فرح .. بس عين تتهامل
يغايب خاطرالله كافي يمتى تعود
دون حدود
جيتك عود
لاوالله إجيتك منﮕطع .. موعود
كاسرني الهجر وعله الوصل .. موعود
بس كافي بُعُد ياسيدي .. مو عود
جفني عله انتظارك بالنحب يثﮕل
يثﮕل جفني سهران عله حد ضواك
واترجاك .. ووين الﮕاك
اتسامروْيَاك بْمَضْيَف الونات
فناجينه البﭽي ودلاله الغصات
وانت عله النجوم بعيني تتمثل
واتوسل
وأتأمل
وتموت الروح لو فﮕدت أملها
النجوم تمل مناحاتي واملها
وإلك أكتب حروف الهم واملها
وصوتي بالنحيب دهور يترتل
واصيح عليك وينك ..
موكافي الحزن مابيه واتحمل
لعد بابك رحت منواي سردابك
أريد اشكي واعاتب واحﭽي واسال غيابك
حملني جناح ضيمي وجيتك بحسره
مريت عله بابك .. جيت سامره
مستعره
ومو مره
إجيت لبابك ومريت مره
وشفته ينوح اشوف الضيم مَره
أشو دارك يشكي الضيم مَره
أشوفه ينوح ع لماصار ودمعه هل
إذا لحت الضريح ولمعة القبه
اْعَرَفِت دارك .. لﭽن هالنوب بيش اندل
عجب هالمره بابك ضاع يمدلل
لاقبه وضريح ولامنارات
سامره ؟ البقيع ؟ شو ضاعبي المحمل ؟
وانته شلون تتحمل
وعلينا شلون ﭼف الضيم يتمرجل
هيهات المذله وترضه لو ننذل ؟
ضريحين اهجموهم ﮔللي شمتاني
شالباقي بعد يبن النبي المرسل
يغايب ﮔوم هجموا بيت عودك
يمن ينفح كرامه وطيب عودك
إلك ثارات متأملين عودك
دخيل عليك بمك جيت أتوسل
دخيل عليك بضلع الزهره أتوسل