زهرة الشباب القاسم (عليه السلام) يريع الگلب يمدلل=يجاسم جاعده يمّك يبني گوم باصرني=عفتني ليش ماني إمك شلون أنساك روحي وياك يبني يا ضوه عيوني يبني مو محل النوم=فك عينك إوحاجيني وين أنطي الوجه عگبك=رايي تاه دليني ما أوچد بعد دزبي=منها سال مي عيني وما أعتقد تتبرّه=ما هي إمناسبه منّك شلون أنساك روحي وياك يبني يا ضوه عيوني تسعه بالحمل شلتك=وأطلبك بالمنازع ذاك وأطلبك بالحليب اللي=شربته وسهر ليلي إوياك أبچي مثل ما تبچي=وإتسله الگلب برباك ما خليتك إعله الگاع=تمشي إوشايله همّك شلون أنساك روحي وياك يبني يا ضوه عيوني ما هميت بس برباك=يبني وأحسب إسنينك وتوصل حد مواصيلك=وتنظر لمّك إبعينك وأعرسك وأفرح إبعرسك=وأخضّب حنّه چفينك أبد ما چان بحسابي=حنّه يصير إلك دمّك شلون أنساك روحي وياك يبني يا ضوه عيوني وإملبّسك صار الزان=والنشاب يوليدي وزفوك برماح وبيض=ياسعدي وبدر عيدي ردت يومي گبل يومك=وإنت إتحضر توسيدي حسابي طلع بالمگلوب=يالبيك إنفجع عمّك شلون أنساك روحي وياك يبني يا ضوه عيوني الولد مريود يالمهيوب=يبني المثل هالساعه يالنارك إبلب إحشاي=يالغطريف لساعه إجه عمّك إبدمع العين=چوچه إعليك فك باعه مسح دم وجهك إبچفه=وحسره جذب وإشتمّك شلون أنساك روحي وياك يبني يا ضوه عيوني ردّت نادته رمله=كافي النوم يا جسّام عمّك خلصت أنصاره=والعسكر عليه هالحام گوم إنده علي الأكبر=إشلون ينام وإنت تنام منهو بالحمل ينهض=يمن عودك ضخر ضمّك شلون أنساك روحي وياك يبني يا ضوه عيوني لاچن يولدي معذور=أحشمك غصب يمنتّب أدري عتب ما تحمل=وأعتبنّك يالمعتّب شلون تگوم وأمواصل=طبر يالشهم وإمهذّب بسيوف العده وسفه=وحيف الغبره إتضمّك شلون أنساك روحي وياك يبني يا ضوه عيوني يا سلوتي شلون تنام=من بعدك شلون العين يالما تمت إسنينك=وحا تفني عليك البين غبت والسهر ظل لمّك=يا ضخر الحسن لحسين يعريس الحرب يبني=إرماح إعداك زفّنك شلون أنساك روحي وياك يبني يا ضوه عيوني