هذا العزيز للشاعر: سلمان جمعة أم البنين اتوصّي عباس الشفيّة=يوليدي غير احسين ما عندي وصيّة عباس ربيتك ابحجري اعلى الشهامة=وغذيتك ابحب النبوة والإمامة واحسين علمتك إلهْ تحنيّ الهامة=وحگّي تبيّض وجهي عند امّه الزچيّة إگعد اگبالي گبل لا تتركني واتروحْ=وامسح على گلبي تراه اعليك مجروحْ يوليدي يا عبّاس إنته العمر والروحْ=يا ليت گبلك أنذبح في الغاضريّة أدري بعد متروح يبني ليّه متعودْ=يا ليتني ويّاك واحمل عنّك الجودْ چنّي أشوفك عالنهر مگطوع لزنودْ=مثل الگمر مخسوف وادمومك جريّة إسمع كلامي زين يا ليث الحريبة=والتفت لحسين او لزينب هالغريبة والطفل يا عباس ليه الماي جيبه=چنّي أشوفه امگمّط ابثوب المنيّة ووصيك يا عبّاس يا حامل الراية=لا تشرب امن النهر لمّا اتخوض مايه واذكر أخوك احسين واطفاله ظماية=وادري ابچبدك من ظماهاْ ملتظيّة ووصيك يا عبّاس لو يم الشريعة=گطعوا اچفوفك يبني لترد للوديعة خوفي عليها اتذوب من نار الفجيعة=وادري بعد عينك يودّوهاْ سبيّة گلهاْ ييمة اوجاه مكسورة الضلعينْ=حتى الشمس أطفيهاْ لو يأمرنيّ احسينْ والجفن ما يحتاج يتوصّى على العينْ=هذا العزيز او طاعته واجبْ عليّه وامَّه الوديعة اعيوني يا يمّة خدرهاْ=روحي او دمّي لو تريده تحت امرهاْ بس اعذريني لو شمر تالي أسرهاْ=چفيني مگطوعة وجسمي عالوطيّة