زرعتكْ بالگلُبْ يحسين شتلات= وخضَّر هالگلب من بيك أنا زرَعْتَه وصار الگلب هايم بيك ولهان= تسمعه يصيح باسمك من يدُگ دَگتَه چَمْ بيت بطريق اسفاري شِفت لگيت= بس بيت اللي عنون اسمك سكنته وچم درب المِشَتْ ضيَّعت بيه الناس= خالفت اللي ضاع ودربك سلكته چم واحد تغاضه وعن طريقك حاد= وبدم الوريد اهديته شيعته ولو مهما الزمان يظل يصد ذكراك= تبگه جروح تبهض شيعته وسنته واليهواك دوم يحنِّي بيك الروح= وكل مامر عمر يغمگْ اثر حِنْتَه ولو ماهالنَفَسْ يحمل الك نفحات= چا حتى النَفَسْ ياسيدي اكتمته حُبنا اليوم الك نلهج نغني بيه= مايوم ارتضينه نحبك بسكته لن حُبَّك فخر واتباهى بيه عالناس= ألف مليون مرَّه حچيته سولفته ويا محله الشعر من يحتضن طاريك= يتسامه الشعر من بيكم أكتبته هوايه من البشر تحمي النَفِّس بسلاح= بس للشيعي حبكم صُبح اسْلِحْتَه والمايلزم بحبَّك يبو الأطهار= لاشك ظلم نفسه وهم بُخس بخته ماهمني العذول شما يسَطر احقاد= عشگتك والعذول استفحلت علته ماتثمر نخيل الماسگاها هواك= وماتمنع شمس وتظلل سعفته وكاس الماحوه لحبكم يبو السجاد= رُفضت اشرب لمايه وبيدى اكسرته يعدُّون الدموع عليه سيدي عداك= وآنا مصابك ويا المصطفه نِحْتَه عِمَتْ العيون من ناح وبچه يعقوب= والباري ذكر بكتابه هم قصته تستكثر دموع المصطفه اعله حسين= ماظن يوم ياظالم تِشِمْ جنته هذا حسين ابو اليمه الدفع للدين= دمَّه والسيوف اتْوَسْدَت رگبْتَه صار اليوم تاج وتعشگه الاحرار= وعيون اليعشگه شابحه لگبته أغلى من الذهب ذرة تُرابه اليوم= وجباه الأبَاة تقبل ترُبْتَه والقبل ضريح حسين أگله اليوم= تشفعله وتصونه بالحشر شفته لئن الشفاف أرق مايجري بيه دموم= ودمَّك بالشفاف اليوم طهرته جبريل اليسجل من تزور حسين= ويزورك علي ابيا وقِتْ زرته وتْظَللْ عليك اغيوم للرحمات= لو گلبك لبو السجاد وجهته