مشتاك الك يا وطن مشتاك للاهوار=يا عراقي ياابو النخل والسعف والجمار مشتاك انه لدير تي و لصحبتي الاخيار=العماره ديرة هلي كَضيت بيه أ أطوار و للبصره روحي هوت وصفناتي بالعشار=ومشتاك أضل للنجف و لحيدر الكرار (ولهان في كربلاء بيه الحسين السبط وعباس اخوه البار) لبغداد روحي تصد والكَلب عد ذي قار=لاهل السماوه احن كلهم وفه وايثار بديالى اكل ثمر واكَطع من الاشجار=با لكوت جني سبحت وبمية الثرثار با لحله جني اكَعدت و اتغزل بعشتار=للحدباء روحي تصد و الموصل وسنجار بعراكَي هايم صرت من زاخو حد الفاو=خليتني يا وطن عاشك واكَول اشعار حكَي من افاخر وطن موبيدي هل الافكار=تنزل عليه غفل و تتكشف الاسرار من اسمع الحسجه شعر بكَلبي توج النار=أذكر مضايف هلي و اصفن وضل محتار غرافه مردي وشبج و اغرف وي التيار=موال أ صدح حزن يفطر كَليب المار وركس المردي بجرف وانزل واسير سيار=بسد الصريفه انطرح نومة فيافي كَصار وافرش بواري الكَصب وانشر البردي كتار=وتلتم عليه الربع ضيف وصديج وجار مسموط ناكَل سمج والقوري مايه الفار=وبا لليل نسمع غرف مشحوفنه الحدار وتبدي علينه الزلم ويتسامرون سمار=وتبتشر كل الاهل من يجهب الخطار نسكَف سمج بالكَصب والخبز ذاك الحار=طابك خبزنه ترف ينوكل هيج كفار نشرب حليبه الصبح وسياحنه بزنجار=تحتومه ناكل خبز و رصاع بالامرار لوكس ولاله و بطل نشعله كلهه انوار=فانوصنه مشعتل دوم و يضل شنيار من شيل هم للوكت و الليل عدنه نهار=نسولف سوالف و فه لاحقد عدنه وثار (ديوانه مدرسه تعلمنه بيه الدرس من جنه احنه صغار) دين ورجوله و كرم ناخذه من كبار=كَربك صعب ياوطن والبعد عنك عار بيك الظلم منتشر و سيف الظلم بتار=هيجت بيه الجرح وَأذكر الي صار كثرت همومي عَليّ والعكَل مني طار=الصار ماينوصف من عفنه ذيج الدار دولاب فرنه الوكت وطبع الوكت غدار=راحت مضايف هلي و ماكو بصريفه هطار موحش مضيف السلف ونترس كله غبار=صبخت ديرة هلي و بيه الهواى طشار تسودن علينه الوكت لمن اجتنه اشرار=بوكَه أجونه البعث و الشعب بيهم حار لا هله بيه البعث خل الضمير ندار=باعت عكَله الزلم بالفلس و الدينار فلوس كلهن طبع والفين كل دوللار=عشنه بمجاعه وكَحط وارتفعة الاسعار شمشوم حط بالسلف و خله الزلم طشار=أعدام نص الشعب و الباقي عاش انذار جاع الشعب وانذبح وصاحواصغاركبار=خلصنه يابوالحسن ياحيدر الكرار