للشدد يبني جنيتك=تالي بالمصرع لگيتك أصرخ وگلبي حزين=من بعد ذيچ السنين تالي بالمصرع لگيتك يا غصن عمري السگيته بالدمع=ازرعتك بگلبي ويحاميك الضلع يبني ما حسبت غصنك ينگطع=وجسمك گبالي يالاكبر ينصرع تحيرت=واصبرت يا تعب سهر الليالي=هذا ما چان اعله بالي أگضي عمري بالونين=من بعد ذيچ السنين تالي بالمصرع لگيتك اسگيت عودك يبني من ماي النظر=حسَّبت تكبر وينفعني الثمر يبني ما چنت احسب احساب الدهر=لن اشوفك تالي محزوز النحر جمرتي=ابچبدي انتظر وبگلبي ناري=يبني چاوين انتظاري وانكتب فوگ الجبين=من بعد ذيچ السنين تالي بالمصرع لگيتك سنين ربيتك يالأكبر واسهرت=وانتظر يوليدي تكبر واكبرت لني شفتك شاب بعيوني صرت=يبني لمن فارگتني اشفكرت اشحسّبت=من غبت عالدرب ظليت اتاني=يبني خلاني زماني أصفج ايسار ابيمين=من بعد ذيچ السنين تالي بالمصرع لگيتك اكبرت يوليدي وفرح بيك الگلب=لني شفتك واگف ابساحة حرب عگب ذيچ الفرحه لن دمعي يصب=عگب دارك صرت بديار الغرب امصوبه=ابنايبه يمته يالأكبرتجيني=عالدرب مشبوحه عيني وسفه يا ليث العرين=من بعد ذيچ السنين تالي بالمصرع لگيتك صحت بالخيمه ودمع عيني ايهلي=يا إلاهي أقسم بغربة هلي ردلي من المعركه وليدي علي=مثل ما رديت يوسف ردّه لي واندعيت=من مشيت وارجعتلي وصبرتني=وهم عفتني وفارگتني بالمدامع والحنين=من بعد ذيچ السنين تالي بالمصرع لگيتك اشبحت عيني والگلب يسعر جمر=شفت اُبوك ايوصّي زينب بالصبر ناشدت من عمّتك شنهو الأمر=گالت ابنچ علي اطاح من المهر ابحومتك=جثتك من عگب ليلي السهرته=وكل تعب عمري التعبته شفتك اگبالي طعين=من بعد ذيچ السنين تالي بالمصرع لگيتك يبني جسمك طاح ما بين الخيول=والسفك دمك سفك دم الرسول حرت شعتب عالدهر يبني شگول=ريت عمري اخلاف عمرك لا يطول گلبي ذاب=بالمصاب والأشد واعظم عليه=من عگب خدري سبيه وانت بالمصرع رهين=من بعد ذيچ السنين تالي بالمصرع لگيتك (لندن 1995م)