حسين للتوديع لم اعياله= وهاي آخر ليله من الياله هاي آخر ليله يدري من العمر= والفراگ يصير لو صار الفجر ما مثلها ليله بالدنيه تمر= على حسين وعيلته وأطفاله للحرب سبعين الف متحامله= زحفت الليله وتريد اتقاتله طلب بس هالليله منها تمهله= وبالفجر خل كلها تتعناله امهلوه ورجع لاهف للخيم= اتلگته زينب وللملگه ابتسم گلها يم الحزن لميلي الحرم= حان لبن امچ وعد آجاله نادته عد عينك اختك صابره= وبالجهاد امساهمه ومستبشره لاچن الليله الموادع لو جره= العاهدك يسفر ابدمع آماله اجمع انصارك وأخذ منهم عهد= وكل اخوتي امجنده يد إعله يد والحرم ينتظرن ايحل الوعد= يعرفن واجبهن وأهواله ابخيمتچ ناداهها الموادع يصير= واعله صبرچ يختي معقود المصير صاحت آنه اختك ترآنه أول نصير= بدرع صبري مصابك اتوگاله استاذنت منه وتعنت مسرعه= للگلوب الظاميه المتصدعه اهتفن گومن لبو اليمه انودعه= وأبد ما نظهر حزننه اگباله من خيمهن طلعن ابدهشة مصاب= لخيمة التوديع همن بالذهاب لا عويل ولا ملامه ولا عتاب= ونشفن دمعتي الهماله اطلعن وگلوب الحزن نبع صبر= عالأرض يمشن ولاچن عالجمر حيث يدرن بالفراگ اصعب أمر= وحالة التوديع اصبح حاله اجتمعت ابخيمة العصمه العايله= بيها كل مكفول ودع كافله وزينب لتوديع اخوها اتواصله= والحزن بالصبر تتصداله نادته يحسين ليهمك الحال= الوي جيدي للدهر خويه محال ادري جسمك يظل دامي اعله الرمال= وبيد خوتنه ألم أوصاله اوياك اشوف اجسوم اخوتي امصرعه= وأودعها واتجه للمشرعه الگه چفين الكفاله امگطعه= والكفيل اموسد اعله ارماله ويه خدر اختك يروح امخيمه= وما يظل نغار النه ولا حمه ومن تشب نار الخيم فوگ الظمه= اعليك تسمع صرختي تتعاله وبعد ليله ابخوف تمضي اعله الحرم= لا حماة ولا كفيل ولا خيم وحالة السجاد التفسر الصم= ابجيده چتالك يشد اغلاله (الكاظمية المقدسة 1976م)