حضور السجاد لدفن الحسين طب علي السّجاد للعرصه و دموعه امنثّره=شافها تزهر و من طيب لَمجاد معطّره شاف جسم حسين و اجساد العشيره امضجّعه=و شاف جمع امْن الخلق عند الجسد متجمّعه قال شلكم يا خلق عد هالجثث لمصرّعه=قالوا نتفرّج عليها و دم دمع عينه جرى قال لا تخافون انا ابن حسين جيت بْوَجعتي=قصدي أدفن و الدي و ادفن اعمامي و اخوتي قوموا حفروا قبور عنّي المرض ناحل قوّتي=و خلّوا ادماهم غسلهم و الجفن سافي الثّرى حفروا قبر حسين يمّه و قام محنيّ الظّهر=وضع يَدْ تحت الرّجل و الثّانيه تحت الظّهر قام كلما رفع جانب جانب الثّاني يخُر=صاح بويه شْلون اشيلك ولوصال امطشّره لا جفن تحصل يَبويه ولا حنوط و لا غسل=نور عيني و لا عضو منّك بلاخر متّصل ذاب قلبي باريه بالله احضروا لي بالعجَل=نجمع اوصاله و نركّبها و نلفّه و نقبره ركّب اضلوع الصّدر و الدّمع من عينه ذروف=حط على اجتافه الزّنود وعلى الذّرعان الجفوف ويل قلبي من فقد خنصر ابو سكنه العطوف=رد يحوم و يجذب الونّه و يدوّر خنصره لَمْ جميع اوصال ابوه اللي انكسر و اللي انهشم=حتّى قطعة قلبه اللي استخرجوها بالسّهم ما بقى غير الكريم عْلَى الرّمح يبرى الحرم=و لفّه اُو مدّده ابْقَبره و ظل يشمّه ابْمَنحره رد على الأكبر لقاه امقطّع و راسه قطيع=حفر قبره و انحنى له و شاله ابقلبٍ وجيع جهّزه وجهّز الجاسم و اخوته و وارى الرّضيع=و التفت للمشرعه و حن و تعلاّ اتْحسّره قصد للمَسْناة يسجب عبرته محني الظّهر=شاف ليث الحرب متوسّد اذراعه اعْلَى النّهر صاح عمّي انتحل جسمي امن المصايب و القَهَر=ابْذمّتك زينب يَبو فاضل و تمشي اميسّره وين جفّينك يَعَمّي وين راسك و العلم=آه لو سلمت اجفوفك جان ماحرقوا الخيَم وجان ما واحد كَفُوا يسلّب يتيمه مْن الحرم=ليت دهري ايعود ليّه بالليالي المزهره