الرأس الشريف مع الراهب راس الشّهيد حسين لو شمسٍ مضيّه=فوق لسنان ايلوح خبتي يا أميّه مرّوا ابدير الرّاهب و عاين انواره=بالرّمح يسطع والخلق كلها حيارى حتّى اليهود اتعجّبت ويّا النّصارى=راس برمح يتلو الكتاب اشهالقضيّه بس ماسمع هلّت ادموعه صاحب الدّير=و أشّر و راد امن التّعجّب عقله ايطير وقلّه يراس الفَخَر يا ريْس الجماهير=من ياسلالة شرَف يالنّفس الزجيّه قلّه انا الذبحوا على صدره فطيمه=والظّامي اللّي بالعطش حزّوا كريمه و اللي على اظهور الهزل حسّر حريمه=هذا كريمي و الجسد بالغاضريّه جدّي حبيب الخالق و خير النّبيين=والوالد الكرّار حامي حوزة الدّين و امّي شبيهة مريم و ست النّساوين=وابّبيتنا الاملاك كل صبح ومسيّه قلّه يروحاني الملا لو حْضَرِت يومك=جان انسفك دمّي قبل تسفك ادمومك من قبل عدنا ابكتبنا واضح اعلومك=و هالدّير بانينه على عْلومٍ خفيّه منّك يَراس ابن البتول اطلب شهاده=امصدّق ترى ابجدّك و متوالي اولاده يحسين و اتبرا من النّاصب اعناده=لمّك و ابوك و من افعال الأوّليّه شلون المسيحي ياخذه ابحجره و يرسمه=و يعتنق دينه و يسأل المعبود باسمه واليدّعي مسلم يسب دينه و يرجمه=فكّر يَزاكي العقل واحكم بالقضيّه إسلام دعواهم و راسه ناصبينه=فوق الشّجر باحجار ظلّوا يرجمونه واللي على الرّوشن تصك غرّة جبينه=مسلمه اتقول الفاجره بنت البغيّه ينشي التلاوه يرتّل ابآيات مولاه=وصكّت جبينه بالحجَر وانفجرَت دماه و زينب على كور المطيّه اتصيح ويلاه=يا جدّي المختار يالزّهرا الزجيّه صكّت ابمحملها الجبين وظلت اتنوح=وظل الدّمع والدّم على الوجنات مسفوح و تصيح بالذّل والحزن ما تطلع الرّوح=يحسين عيشه ابهالهضم قشره عليه { الناظم } الخادم يَبو السجّاد بلّغته مراده=و هذي الكم يا صفوة الجبّار عاده ومن فضلك وجودك بعد يطلب زياده=وصحّه ابخدمتك يرتجي منّك عطيّه