سقوط الطفله و ضياعها ريّض يحادي الظّعن ساعه ابهالمطيّه=خل هاليتيمه الضّايعه تلحق عليّه ريّض النّاقه و ارحم ابحالي يَميشوم=مَتْشوف حالة هاليتيمه اتّطيح و تقوم و مثل الحمامه الرّاعبيّه تنوح و تحوم=و تصيح ريضوا لي ابهالنّاقه شويّه يختي سكينه عْلَى المطيّه ركّبيني=و آنا العزيزه اشلون بالبر تتركيني مَقدر على قطع المسافه تعرفيني=ابهَلبر لَقفر تتركيني يا زجيّه و سكنه على النّاقه تحن و اتْدق صدرها=و تجذب الحسره وتصد للطّفله ابنظرها وكلما تقلّه يا زجر سبْها و زجرها=و يقول بس من هالبجا يا خارجيّه صاحت لذب نفسي من النّاقه للتْراب=مَقدر اشوف اختي و قلبها من الشّمس ذاب و المشتكى لله و لبونا داحي الباب=رد الرّجس ليها و جبده ملتظيّه و حالة القشره يوم وصّلها و لفاها=و سكنه على النّاقه و تشوفه يوم جاها ابرجله رفسها و خرّت الطّفله ابثراها=و رد و رفع سوطه و هي فوق الوطيّه وظل يتلوّى السّوط والطّفله على القاع=نوبٍ على الهامه و نوبٍ فوق لَضلاع وذيج اليتيمه مالها ساتر و لاقناع=ومن الضّرب بس تجذب الونّه خفيّه اتصيح ابضعيف الصّوت بويه ضيّعتني=بين العدا و من زغر سنّي يتّمتني يا بوي من ضرب السياط اسود متني=وجسمي تراهو انتحل من ركب المطيّه