لو نِشَف دمعك على مصاب الضلع = إعصر جفونك وخل تنزف دمه وخلي بالهم نوح گلبك يرتفع = وصيح ما ننسه مصيبة فاطمه دمعة عيونك سحابه من الغضب = جمر تمطر عل مظالم ناقمه وهذي حسرة مهجتك لفحة لهب = تِرهب عروش الطغاة المجرمه صارت الدمعه على مر العصور = صرخه بوجوه العُتاة الغاشمه لو جرت شبه الرصاصه من تثور = منهه تتراجف گلوب الانظمه لا تگصّر بالدمع مهما جره = ولا تخاف شما تلوم اللايمه واذكر مصاب الوديعه الطاهره = واشعر بحسرة گلب حامي الحمه يعثر ونين الامير بعبرته = صابر اعلى الغيظ والهم كاظِمه شاف صوره عن مصابه وطبرته = وصرخه من وحي المصايب قادمه شلون حرگوا بابهه بنار الحقد = باب وحي الله بحقدهم مضرمه شلون بالعصره انكسر ضلع المجد = وانحنت لمصيبته ضلوع السمه شلون طاح اجنينهه بحجر الحتوف = بدال مهده بمهد آجاله ارتمه ونسِبت زينب گبل يوم الطفوف = والخِدِر شافت لهيب مخيّمه والحسن أصبح گبل سمّ الغدر = چبدته بسمّ الحزن متهشمه والحسين وگلبه بالهم يستعر = من گبل ما يسعر بنار الضمه واحنه ويّه حسين حاربنه الدهر = وما غُفت أمواجَه المتلاطمه وصار من يوم الضلع حادي القدر = يحدي بينه من مصيبه لموزمه وعِشنه ويّه الفاجعه بطول الزمن = اوظل حزنّه وما تغيّر موسمه من وطن تاخذنه دمعتنه لوطن = اوصُفَت عنوان لعقيدتنه اوسمه ما نبطل النوح والعبره التسيح = اولا تطيب جروحنه المتألمه واللي يسأل عن هويتنه نصيح = إحنه عشاق الحسين وفاطمه