خسر عمره الزمان إلما وقف وياك=وما أنصف سناك وما عرف قدره منو إلمثلك عليه اتكالبت الأزمان=وعلى نار المحن يخبز وجع صبره رجع موتك كسير وخايب ومذلول=وروحك بالخلود اتكمّل المسرى بكثر ما بالفضايل تنذكر مولاي=تحيّر هالزمن عن فضلك شيقرا كرم عندك أخاف أتوغّل بمعناه=لأن ماكو إلا ربك يقدر ايحُصره منو إلمثلك وجبرائيل يهز مهدك=ومحد قبلك مُحمّد قعّده بحجره ومو سيد شباب الجنة انته شلون=يجازيك الزمن يالمجتبى بغدره فتحت أحضان عطفك في وجه ليتام=تشبّعهم حنان وتفطر بكِسرة صفى بيتك مضيف وما يرد محتاج=كريم وحاشا تكسر خاطر الفقره السِهام الي اعلى نعشك بيها جم تأوييل=وفي عاشر للبشر تتوضح الفكرة أول سهم يم نعشك توجّه ذاك=مسمار الي نابت في حشا الزهرة والسهم الي بعده اختار صدر حسين=وانته الي نزعته اوياه من ظهره وثالث سهم عباسك ينزعه شلون=ومنه مقطعين اليمنه واليَسرى بس رابع سهم كان شكثر محتار=واختار الرضيع وقبّله بنحره صبور شقد تحمّلت الظلم لليوم=وجرحك ناضج ابلقلوب ما يبرى منو إلمثلك يشيد للسلام صروح=وبس شاهد يظل بهالزمن قبره يطيّرنا الوله عندك حمام أشواق=لكن في الفؤاد الشوق شيطيره ودنا نزورك وقبة ومنارة نشوف=وشبّاك وضريح امذّهب وحضرة ونزحف يالحسن ليلة وفاتك كون=مشاية ومضايف ليك منتشرة ويم قبرك نحط التعزية ونبجيك=ونكتب بالدمع "مأجورة يا زهرة"