براءة ذمّه أبري اوياك خلِّيني =و اريد الزهره عن تقصيري تبريني
يبو الحسنين دَين العلَي أدّيته =مثلما ردِت منِّي العهد وفّيته
* * *
أم البنين امّ الوفه= ابهاذه السِم أتسمّه
من شفْت العيله اتجمِّعت = و اتوصِّي يا بو اليمّه
لاحت علايم فرگتك = و كل واحد لاج ابهمّه
و ابخاطِري يا ابالحسن= أتباره اوياك الذمّه
أريد اقسم عليك ابفاطمه الزهره
چنِت إلكُم وفيّه لو أنه امقصره
شفتني اشكثر هاذه البيت حبّيته
مثلما ردِت منِّي العهد وفّيته
* * *
ابهالشرف منّ اتشرّفت = آنه الربّيت الحسنين
ما ظم مره مثلي أبد = تتفاخر ابهالتعيين
أولاد الزهره ابذمّتي = و عاهدتك واحلفت ايمين
روحي و حياتي و مهجتي= و احفظهم ابوسْط العين
أظن من عندي واضح إلك مگصودي
أريد اتگلي آنه اشچنِت بعهودي
ابيتامه الزهره وعدي اشلون لاگيته
مثلما ردِت منِّي العهد وفّيته
* * *
إنته و بنينك مجتمع= اتودِّعهم و اتوصّيهم
للطبره ما يحصل شفه = و ابنفسك اتعزّيهم
و آنه اوگفت متحيِّره = و اتعدِّد شيحِل بيهم
و چنّك تگلي ابنظرتك = اتكفِّلي و حِنِّي اعليهُم
عليمن يا علي و بيمَن توصّيني
العهد ويّاك باقي البينك و بيني
شمل هالبيت يوم ابعيني حطّيته
مثلما ردِت منِّي العهد وفّيته
* * *
يال بالحسن عهْد الوفه – ما ينگضي ابعهدي اوياك
آنه و بنيني الأربعه= رايح نقرلك عيناك
وكت الشدايد يا علي = باﻷربعه اتشوف ارباك
و اتطمإن ريت الطاهره= باچر لمّن تتلگاك
نذر الها تروح اربعة أولادي
و لا تغله علىٰٓ ريحانة الهادي
و اگول ابكل إبن يوفي ابتضحيته
مثلما ردِت منِّي العهد وفّيته
* * *
عِشرة عمُر ويّاك انه = و تعلم ابطبعي و تدري
اتحمّل اصروف الدهر =و اشكبر تعرف صبري
أتشرّف الكم أفتدي = روحي و حياتي و عمري
ما ريد اظل متريِّبه = و اعلم عليّه اشيجري
أخلّص عمري بالحسبات و الحسره
يحيدر و انته ابحالتي أدره
و ظنّك عنِّي يصدگ بيَّه ياريته
مثلما ردِت منِّي العهد وفّيته
* * *
يوم الوعَد من نلتگي = و الموقف بيه امّ احسين
و آنه و بنيني اﻷربعه = اگبال الخلَگ مصطفّين
و وكْت الجزه لو ناشدَت= يمّ البنين اشتردين
من عدها أطلب و ارتجي = بديها اتشيل الچفّين
اذا رفعت اچفوف الگمر بيديها
أصيحن هاذي منِّي و إلچ أهديها
و اگلك يا علي هالوعد أدّيته
مثلما ردِت منِّي العهد وفّيته
* * *