الكلام الوفي في مدح ألإمام علي (ع) «شيعتي» يا علي نفسك انصاغت = من لطف رب البريه واسم من اسمه الأعظم = شگلك ورادك سميه نور شگلك من انواره = واجعله نور الهدايه وذات من ذات الجلاله = خص الك دون البرايه تولدت منها الإمامه = وعروة الوثقى الولايه ومنها صرف ونحو اتولد = والفصاحه العربيه ياعلي جملك ربك = من حسن ذاته الجميله وراد غيرك ليتمثل = بيه واختارك مثيله واصطفه من الناس صفوه = المصطفى وانت زميله واجعلك اشرف عباده = من عگب طه نبيه ياعلي ما زادك احد = بس محمد بالنبوه وهوه منك وانت منه = او بينكم عقد الأخوّه وانت شاركته المحمد = على الأمه بالأبوه ملك وانت بحق وزيره = وباجي الوادم رعيه آخره ودنيه محمد = ملك باريه اختاره وسلم الهادي ابيمينك = ياعلي ازمام الإماره وبأمر رباني توج = راسك ابتاج الوزاره اتصاليه ودفاعي = وخارجيه وداخليه ياعلي عينك ربك بهل = اداره شچم وظيفه هم اماره وهم وزاره = وبأمر رسمي خليفه وانت نعمه وانت نقمه = وانت رحمه وانت سيفه وانت يده وعلى كل يد = ياعلي يدك عليه الكل بشر تحضر ثلاثه = من عده مدة حياته مره تحضر بالولاده = واتحضر دونه ابمماته وتحضر ابيوم القيامه = ياعلي وتسعى ابنجاته للي الكم والعليكم = تشفع وللأجنبيه واليموت اعله الولايه = نجه من تقرير منكر تلقنه ويقتبس منك = بالإفاده ميتعثر واليحبك بالله ناجح = واليضدك حين يضطر يلتجي ليك وتعينه = والعفو عدكم سجيه للجهل معناك تحضر = ياعلي ابساعة حسابه وتسأل الباري ابرحمته = اوجاهك يخفف عذابه والمحب ياخذ تبريه = وانت التصدق كتابه ويدخل الجنه ابصراحه = بلاعريضه او دعوتيه ياعلي ابمدحك دليلي = فجرت عينه البصيره والمحب لوراد يمدح = إله ابمعناكم سريره والعدو من يبدي فضلك = يضهد ابمدحك اميره والينشده اشلون تمدح = يعترف غصباً عليه من عدى التوحيد حبك = ياعلي اول فريضه واعتقادي الذنبي باچر = باتصالي بيك اميضه وارضى ابمدحك الباري = لاچن الضدك اغيظه لا اغالي ولا ابالي = ولا اتاقي ابكل تقيه ياعلي وعلم المنايا = والبلايا الكل حفظته وما چسب تلميذ درسك = من فم القدرة درسته والدليل ابهاي چتلك = بيه ابن ملجم خبرته وما خفاك الچان مخفي = حدر ثوب ابن الدعيه چنت تطوي الأرض طي = السجل بامر الله وقدرته والدليل ابهاي لمن = شاءت الباري حكمته من المدينه للمداين = اگصدت سلمان ودفنته وظل حسين فوگ الوطيه مطروح بسهم الگوم منمرد چبده ومجروح تصد علماي عينه وينازع بالروح يصيح من يروي دليلي = من الضمه ابشربة اميه ياعلي طبره اعلى طبره = ابجسمه او حربه اعله حربه مهجته من اجروحه فاضت = والمثلث گطح گلبه وروحه عد زينب رهينه = وعالخيم عينه اتربه حسين ايلوج والزينب ايباريها نفسه اتهون واخته يخاف اعليها الغيره ابنار تحمس چبد راعيها ياعلي وحسين راسه = حوه الغيره الهاشميه هذا حال حسين خله = وشوف حال مخدراتك انهتك عگب حسين = خدر المنحجب چان ابحياتك حرگوا بنار المخيم = ياعلي وفرن بناتك للميدان سكنه تعنت لحسين وي ادماه منها انخبط دمع العين بويه الماي يحرم عليك ابيادين ؟ يتمتني اوضيعتني = اوضعت بأرض الغاضريه طاحت اسكينه اعله بوها = تجلب اجروحه او تشمه بالترب تتواره نوبه = ونوب تتخضب ابدمه تراكم الظيم اعله گلبي = وبعد إلمن يشچي همه بويه حسين آنه العزيزه اسكينه دگعد شوف خدر الفواطم وينه بروحه ايجود گام ويدير ابعينه وشافته ايحرك اشفافه = الشيعته يبدي الوصيه شراد أبو اليمه ابو صيته = ياخلگ ماتنشدوني ( شيعتي مهما شربتم = عذب ماء فاذكروني ) ( او سمعتم بشهيد = او غريب فاندبوني ) ماتنساك شيعتك ياواليها بشرب الماي ذچرك يعم عليها وانت ابفيض دم رگبتك شاريها صواب البگلبك ابگلبي = ثابت وناره سريه