الكون الدوّار «هجري»(1) سايره الدنيه بهلها مثل عيس الهايمه= تحمل الماي إبظهرها إو دوم چاتلها الظمه ناعم إملامس الدنيه لاچن إيزول الحياة=واليلامسها إيتلسع بألأذناب أللاسعات لو ردت برهان قاطع جرّب إتشوف الممات=لامس الحيّه تجدها إشلون سلسه أو ناعمه لو تشوف إزمام دنياك إبيمناك إنطوه=لا تظن للصبح شمعه إيدوم إلك منها ضوه لو ردت شاهد إسليمان إتسخَّر له الهوه=وين گلي صفه إسليمان إو عرشه إو خاتمه الدنيه لو شاورت فكرك لا تشاورها إبأمر=(تجنب)(2) الظاهر إو خوض الباطن إتشوف المكر هذا كون إو فلك دوار إو شانه إبكل عصر=يجعل الدنيه الدنيّه إبوجه واحد باسمه لو چنت قارون عصرك لا تغرك ثروتك=إبماي عين أللطف ساقي فرع شجرة نعمتك خاف بيك ألأرض تخسف وإتسجل دعوتك=وتنسأل بحساب ألأموال أمام المحكمه لا تحث جدامك الدنيه إو بعزم غيها تزوم=هاي زومه الطاح بيها بعد لتظن بي يگوم إبهاي يشهد لك القرآن يخبرك ما تدوم=لا چن إيغرك الشيطان يگلك دايمه أرض غي دنياك صبخه بيها لا تغرز شجر=إو لو غرسته إيروح تعبك هدر ما يحصل ثمر لو ردت شاهد إو برهان إلك نص الخبر=من الصبخه إو من ثمرها (لا)(3)لترجه غانمه من جهل نفسك إو دنياك الباري حذرّك=إبمحكم التنزيل آيات إو بيهن أنذرك إنچان فكرك من التفسير عجز وإتعذرك=طالع إبنهج البلاغه إتشوف شرح الترجمه لو ردت من المهالك تبرح الدار السلم=أبد لا تكتم شهاده إو من ينصبونك حكم علم لا تظهر الباطل لا تضم للحگ علم=لا حرام إتحلل إو لا حلال إتحرمه إتجلد إبجلمود صبرك لو شفت دهرك جفاك=إحتسب هاليوم باچر تتسع باب النجاك إو لو يوصّوك إبوصيه حافظ إحگوگ الوصاك=مثل ما حافظت زينب حگ وصية فاطمه تدري إبهاي الوصيّه فاطمه إشچانت تريد إهنا يزينب لو عزيزي حسين ظل بالطف وحيد لا معين اليذب عنّه إو لا نصير إو لا عضيد مهر حسين يا زينب إتجدمينه=وتچشفين عن صدره وتحبينه وتودعيه وبمنحره إتشمينه=هاي من (أُمچ ) وديعه إو لبن (أبوچ) أمسلمه سلمت زينب وصية فاطمه العزها الحسين من تخوصر بالمخيم جذب من چبده الونين إو صاح حل الوعد يعيال إو بألله إمودعين ريت إتشوف حالته إو حال إعياله=زاد النوح وأثگب صريخ أطفاله إو گلبه إبنار وج وإحترگ دلاله=إونار الفراگ إبضميره چملت نار حنَّت إونت أم كلثوم إو نادت يا غريب عِلم الفراگ إبضميري إنطبع وأثگب باللهيب أسلمت يحسين للموت والمفارج جريب يا مظلوم ردنه المدينة جدنه=من بعداك منهو اليحامي حدنه يختي إبهاي باري السمه إمواعدنه=أوفي إبعهدچ إو ظلي عالمصايب كاظمه سدر من عگب الوداع حسين والضامر جريح وبضعيف الصوت خلفه سدّرت زينب تصيح نوب تعثر نوب تنهض نوب عالغبره تطيح راشد وين يابن أُمي وتخليني=رايح ليش من عيني يصبي عيني بألله إعليك كِعْ المهر وإتنيني=حسين لمن سمع زينب نزل من إمطهّمه إشلون وگفه إشلون ونّه صارت إو حنّة إگلوب نادت إكشف لي وريدك يا شبل داحي البوب عرف شنهو گصد زينب رفع عن صدره الثوب أدنت ليه وإتشم أخوها إبنحره=وإتناديه زينب إو تجذب حسره يا مظلوم هذي وصية الزهره=بچت وأبچت عين الحسين إو سكان السمه إتعلگت زينب بخوها إو للمدينه إتوجهت من گلب مرعوب يم الحسين يالزهره إصرخت چان إلچ عندي أمانه إو لبن الساعه إوصلت هذا حسين من النحر شميته=إبماي العين عن العطش روّيته من بعداچ حگ العَلَي أديته=إتكفلت منّه بناتچ وآنه بيها إموزّمه هاي شمّه إو بعد شمّه شمّت حسين الشهيد من بگت جثته بلا راس رميّه إعله الصعيد إتخضبت من دِمه إجروحه إو شمّته من الوريد عالتربان نايم ينور إعيوني=وصارن سود من السياط إمتوني وللشامات أمشي إبيسر يردوني=إشلون أعوفك عله الغبره إمعفّر إبفيض الدمه