النداء إلى السباق وتهذيب ألأخلاق «هجري» يا من إبدنياك شاغل نفسك إبطول ألأمل=أظن غافل ما دريت الگبر صندوگ العمل يامن إبدرب المعاصي تهت وأنفقت العمر=منشغف بهواك سكران وجاثم بالسُكر إنتبه لا ينبطش بيك وينحط ألأمر=إتصير للمخلوگ عبره وينضرب بيك المثل لو حضرت الشر تجنب لا تنبشه الشر يمس=أبد لا تطغه إعله جنسك إو عله راسك تِنِّكس لا تجر نار الگرصتك وإكتسب عزّة نفس=ولو تصير إبمال غيرك حاتم إيصيبك خجل إكرم المتولي أمرك تصبح إنته إعليه أمير=وإسأل إللي أدنه منك تبگه بين إيديه أسير إستغني عن (من ما تشاء) إتصير إله إبعصره نظير=هالمعاني حكم قدره إبترجمة مير النحل بعد أوصيك إبوصيه دوك إخذ حچيي سند=إبليس لو جاك إبمواعيده تره إيخون العهد(1) گلّه فوگ وحدر شفتك وإشبعت من الوعد=عاهدت من گبلي آدم ليش عهدك ما كمل يندم الجسمه صحيح إو والف الجَربه وگرب=يبتلي أبّلواها لا شك يكتسب منها جرب مثل عند أهل الفصاحه إيمثلونه بالحطب=چم وچم أخضر بسعر اليابس إبنار إشتعل لا تعض زندك أبنابك يوگف إبريجك دماك=وبيك من يمضي إصوابك حاير إتظل إبدواك والطبع لو چان مغروس بأعصاب البدن=لا تظن بيه إيتغير إلّه ميلفَّه الچفن والظرف ينضح إشما بيه وبجوفه إنشحن=وحنظل إيأثر الحنظل لو يعجنوه إبعسل يالتبدل الزين بالشين والغالي إبرخيص=وإنته تدري إبهاي مالك من عذاب ألله محيص لاچن ألإنسان علّي يمتنع عنه حريص=هالخبر واضح بيانه وبكتاب ألله نزل لو چنت تعرف وتحرف تنصح وما تنِّصح=تصير مثل اليمثلوهم والمثل بيهم يصح إيشيدون إقصور ضخمه ساسهن ماي وملح=هاي من قلة ألإدراك ومن كثر الجهل لو ردت منهج يوصلك ذروة العز والعله إنهج إبمنهاج سبط المصطفه خير المله إشلون نهضه نهض للدين إلحسين إبكربله يحسين يالماضي بيك إصوابك=يحسين وألله إن ذكرت إمصابك گلبي إبنار يحترگ مثل أطنابك=مثل مجره دم رضيعك دمعي عالوجنه همل لو صبح يوم القيامه إو وگفت الوادم إصفوف يطب للمحشر حسين إمگطع إبحد السيوف جثته إبلا راس عاري البدن مگطوع الچفوف آنه حسين وآنه عزيز الهادي= للمعبود يشچي الهظم وينادي يارب شوف جمر العطش بفادي=وأنظر الجمّال بيّه إشصنع وبحالي إشعمل بين إيديه يشيل راسه ويبدي صوته إمن النحر يا إلهي أنظر جبيني إنفلع بصواب الحجر يا إلهي الخيزرانه خلّت إبشفتي أثر يا معبود وأنظر الشيبي إمخضب=يا معبود وأنظر الخدي إمترب يا معبود أنظر دليلي إمصوب=إمگطع إبسهم المثلث چامنه بيه العلل يا إلهي أنظر الجثتي بالمواضي إمخذمه يا إلهي إبحافر الخيل إضلوعي إمهشمه يا إلهي وهذا ثوبي ناجع إبفيض الدمه يا علام وإنته إلبصير إبحالي=وإللي صاب گلبي ومرد دلالي يوم البيه راحت سبايه إعيالي=والجره إعليها ضهدني والجره إبحالي سهل يا إلهي والفرضته علّي بالطف بي گمت عله الغبره إلك ساجد من عله غوجي طحت عهدك وياي الشفاعه وإعله عهدك واعدت آنه حسين والوعد هذا يومه =يا رب وين حگ شيعتي المظلومه چانت دوم تبچي علَيْ مهظومه=إتريد حگها اليوم مني وچيف أخليها إبوجل يرد من ألله جوابه يبن سيد المرسلين شافع إمشفع ومسموع كلامك يا حسين إبدمك إشريت الشفاعه وبين إيديك العالمين هاي النار بيدك وهاي الجنه=يا مظلوم إطلب إشما تتمنه وإللي إعفيت عنه تره إنعف عنه=والعليهم شمل غيظك غيظي من گبلك شمل