يا نبعة وفه گلبي مع اشعوري=هالليله الگلب محتار بافكاره شيگول الگلب والعاشگ الولهان=عرف درب المحبه وسار باخطاره وعرف إن المحبه اشواط واشواط=ويفوز اللي فقط ايجيد يتباره وأنا كلما أهيم وعگلي يشتاگ=تضيع اعلوم گلبي ويه أفكاره وگقفت ابباب حبي أرتجب لهواي=وأتاني يمته يمي توصل أخباره وبچيت ابدال دمعي ادموم همال=وجره بالخد عبيط الدمه بانهاره وگلت لمن شعوري فاق الاحساس=وصرت ابعالم العرفان أتواره قسم بالحب قسم بدروبه الصعبات=قسم باللي أحبه ووصلت داره قسم باللي احط چفي اعله شفر النار=لجله ولجل بس إن تنطفي ناره قسم باللي أصب له ادموع عيناي=وكت تنبع مثل ما زمزم اتجاره هذآنه اعله عهدي رغم كل الناس=ما همني البشر لو كلها تتماره حفظت العهد وصار ليه اسنين=والينعد وفيّ يثبتها باصراره ترى حفظ العهد مو چلمه من السان=وچم واحد يگلها ونفسه غداره تره حفظ العهد يحتاج إله وجدان=ومهما صار تبگه النفس أماره لأن ندري النفس من عالم الأرواح=الله گال عنها وخبَّر اخباره لا تطيع النفس يا صاحبي كل دوب=لأن اللي تبعها يمشي ابعاره وطاوع لگلبك شوف وين إيميل=انته ميل مثل الهوه باشجاره ولا ايعوگك نسيم البحر هاج وماج=كلِّف نفسك وخلها اتصير قهاره ولا تحچي أبد ابچلمة العتبات=ولا تبدي العتب وتكشف اسراره مو كل اليعاتب يحچي أمره زين=لابد ما يحرِّف ويسدل استاره ويخفي كل مساوئ تنطبق اعليه=وبين الناس بيگه عالى مقداره واحنه اللي رفعنه العتب والكلفات=ونادينه ابمحبه وونتجت اثماره لا تظن اليحب الناس ايكرهوه=بس اللي يكره يظل وما إله چاره واليسأل عليكم لازم اتسألون=عنه شنهو حاله وشنهي اخباره وآنا الجيت يمكم ما ردت عتبات=ردت هالليله بس انزف البشاره وأخبركم يخوتي انولدت ابهاليوم=بنت المصطفى وشعت انواره واحنه ابهالفرح نشتم عطور الياس=المن عطر النبوه فاحت اعطاره ونبارك للنبي ابمولد الإيمان=ونهني الحاضرين اليوم الداره ونگول اليوم يالهادي صلاتي اعليك=ما دار الفلك وغنَّت أطياره