سَواد الليل من جنها زينب طلْعت ابهالبر او بين أجساد أخوتها تمشي او بيها تتعثر اعلى جسم احسين من وصلت ما كانت تِصَدگ العين من نادت يهالمذبوح صِدِگ إنت أخويه احسين ؟ اخْلصَت أيام عمري اوياك او ظلّت منها بس يومين ويّاك او خلص عمري بس يومين من دهري الظلت عايشه ابفكري او صرت يا خويه باليومين أهيم او بيهن أتذكر إلي يومين يا خويه أذكرها ابگلب مسجور يوم "الثالث ابشعبان" او يوم "العاشر ابعاشور" چنْت امدلل او حولك أملاك السما و الحُور لمْلاك انزلت عندك تهنّي ابجيّتك جدك او جبريل اليهز مهدك او عگب ذاك الوضع لنّي أشوفك بالثرى امعفر أشوفك يوم من تبچي يهزك بالمهد جبريل و اشوفك يوم عالغبره او على جثْتك تجول الخيل طريح او محّد ايحظرك و ايحرسك من وحوش الليل ما واحد حظر يمك يعالج لك نزف دمك و لا واحد إجى او لمّك و لا واحد إجى او فيّاك يخيويه امن الشمس و الحَر أشوفك يوم يبن أمي على صدر النبي جالس او يوم الثاني أنظر بيه على صدرك شمر دايس او ريجك هذا گلي اشلون اشوفه امن العطش يابس ؟ يخويه او منّي تاه الراي او بعد ما صدگت عيناي تموت او هذا جاري الماي منّه ما ذقت قطره او گلبك ظامي و امفطّر أشوفك يوم يا خويه على چتف النبي محمول و اشوفك يوم لارض الشام راسك عالرمح مشيول أشوفك يوم من نحرك يقبْلك جدّي المرسول أشوفه ابنحرك ايْقبلك يمن محّد صبح مثلك لچن فد يوم أنظر لك و اشوف ابعيني چتّالك ابنَفِس ذاك النحر هَبّر أشوفك يوم چن جدّي على اخدودك ثنى اخدوده او على اخدودك أشوفك يوم يزيد ايضربَك ابعُوده أشوفك يوم بشْفافك يبوسك طاها و ابزوده او يوم اللي الصبر عفته لمّن بالطشت شفته راسك تنضرب شفته او من كثر الضرب يا خوي أنظر سنّك اتكسّر