لون خطواتك لون خطواتك صبح والدرب ليل=والتراب اتلامسه يخضر نجم نبرتك جبريل اثناء الصلاة=وكفتك يوم الحرب جانت سلم وبسمتك تسبغ وضوء الانبياء=وبطن كل كلمه من حجيك علم وهاي شمس الله رسم وجهك اكيد=ومن اصرح خاف مجنون انتهم الشمس وي وجهك اتساوة ابيش=اشلون شيساوي الحقيقه ويه الرسم ومو حكر مولاي بس عالمسلمين=منهو يكدر يحتكر طعم النسم لون سيف الجوع ينسل عالمسيح=بدرع خبزك بي تحط مية ثلم ولو يهودي تشوفه عاري بغير ثوب=تنزل ادموعك وتتحول هدم يارسول الله عجيبه الحاربوك=عقولهم صحراء من ماي الفهم غيمهم وكت الحرب بي بس رعيد=وانت غيمك بالحرب يمطر زلم جنت ما تقبل نشم الورده حيل=حتى لاتتروع انشمها بسلم وصرح العاكول بغضا بالسلام=يكول جرح الورده لازم يلجم ومن سمعنه بأحد ترجع من جديد=الخوف شفنا عالكصص صاير ختم الجبل هالمره كالوا مايروح=وكبل لاترجع احد وتكول احم ركضت اطويريج ركضوا يالرسول=عالغنائم واحنه بالدم نستحم وعلمتنه بخلقك انعوف المسيئ=اخوان كلنه والجرح خل يلتئم مسحنه اثار السياط البلمتون=والاعلام اعليه سئل كلنه وشم وعلمتنه انطاول السبعه جلوس=اوي طفلنه الازغر اطولهم قزم وهسه ذيل يريدنه الماله اساس=وما يصير وداعتك لو بالحلم علمتننه انصير خشم العزه دوم=اشلون ذيل أيصير يا طه الخشم