طلعتك يمته يهل اهلالها=ورايتك كل يوم نتربالها لشوكت تبقه يسلطان العصر=غايب اوبچبودنه يسعر جمر يمهدينه اشوكت يلفيك الامر=تنهض اوبيدك تدگ اجبالها تبقه غايب ياشبل حامي الدخيل=وميخفاك اسلامنه اصبح ذليل اطلب من الله يمن صبرك جميل=يرخصك لمتك تنقذ حالها سيدي يبن الميامين الاكرام=يوم عيد التنهض اتسل الحسام يارهين الامر صارت چالحمام=شيعتك وتخاف من اخيالها سيدي ما غيرك بها لواسعه=عد اله الكون يقبله دعه گوض الإسلام والناعي نعه=ينعه ودموعه اعله خده سالها اطلب من الله يغايب تنتهض=ليك نتربه يمن حبك فرض اتناست الإسلام كل اهل الارض=واتبعت ياسيدي دجالها سيدي تسمحلي ياچبد الرسول=ارد اهيجك يگصرالساني شيگول حسين جدك رضرضت صدره لخيول=سيدي وتوسد اعله ارمالها سيدي ماريد اجرحك بالعتب=يگصر لساني يبن سيد العرب فرت امن الطنب من طاح الطنب=النسه وتتراكض على اطفالها سيدي وشچم طفل رضته الخيل=طلع شارد سيدي بظلمة الليل خده يبن العسچري نجمة اسهيل=طفل واليطرد وراه خيالها سيدي ما بقه للخدر اخدور=وما اگول اطلعن حاشه ابلا شعور لا وحگ الداميه ذيچ النحور=البچت الدنيه بجميع اجيالها ساعد الله گلب بت حامي الدخيل=الصبر الها هديه من الجليل اتلم يتاماها وترد ترعه العليل=بخيمته الصارت هدف لنبالها اظلمت الدنيه وسماها اتغيرت=هتزت الارض السمه دم امطرت نشدت السجاد منه استفسرت=يبن خويه الدنيه گلي شمالها گلها ياعمه يبت نسل الاطياب=خل اشوف الجو ارفعيلي الحجاب حين مد راسه عليه زاد المصاب=راس ابوه شافه بطرف ميالها صاح ياعمه يبت جدنه النبي=ويبت ليث العرب عزنه الطالبي باچر اتهياي يعمه للسبي=للسبي باچر نشد ارحالها وبعد ياعمه يبت عقد الوله=اسرعي وبخيمه لمي العائله حلت اعلينه مصيبة كربله=گامت ويسعر جمر دلالها