الإمام جعفر ابن محمد الصادق (ع) (حدي) لجلك يضنوة فاطمه=صارت دمعتي ساجمه من ﮔالوا الصّادق رَحَلْ=من دنيته وعاف الأهل حسَّينه بﭽفوف الأجل=خطفت مهجنا الهايمه يالصادق اشلون الخصم=غالك وخَذْ يبدي الظُلم طاغي وتمادى بالحُكم=ولا خاف من ربَّ السما بِنْ عمّه انته سيدي=ﭼيف اعلى شخصك يعتدي واعليك كل محجر ندي=ينزف مثل سيل الدما ما ﭼنّك ابْن المصطفى=وانته الأصل لهْل الوفا جارت عليك أهل الجفا=وخلّوك تجرع مُوزمه خَسْران كِلْمن خَالفَك=منْهُو الذي مَايعْرفَك والبَاري هُوّ الشرّفك=واعلينه شخصك قدمّه ﭼم عالم ايحدَّث غدا=بسمك يعنوان الهدى وانته الإمام المقتدى=عن كل محب تجلي العمى وِاشْحال أهلك يالولْي=كل منهم ادموعه اتهلي فﮕدك مثل جدّك علي=والشيعه بيك امألَمه ابفﮕدك فﮕدنا المصطفى=والمرتضى راعيْ الوفا بعدك على الدنيا العفا=يلْ ﭼْبدتك متخذّمه سمّك مثل سّم الحسن=واتجرّعت نفس المحن وابفرﮔتك عاد الزمن=كل هالمآسي المؤلمه وامصابك ايجدَّد أسى=أمّ الحسن ستّ النسا والأَشَدْ شفنا ابهالمسا=تنعاد لُوعة فاطمه امصابك عظيم ابهالدهر=وايهون من نذكر نحر سبْط النبي الْدّمه انهدر=وتفجعنا هاي الخاتمه