شـرد اگلـك يـانهر شـط الـفرات         مـاوفـيت وهــم خـنـت مـحـبوبك
شـلون تـتنكر لـبو الـيمه الحسين         وعـنـه تـمـنع تـحـجب لـمشروبك
إل عطش فت يانهر گلب الرضيع         والــطـغـاة اتـهـنـت بـمـسـكوبك
چان واجـب يـانهر شـط الـفرات         تـحـمل لـطـفل الـحسين هـدوبك
وآنــا اگلــك خـيبت كـل الـظنون         وبــدل مـاتـضوي عـراك غـروبك
لـيش يـانهر اقـبلت تسگي الجناة         بــوجـه آل الـبـيت تگفــل بـوبـك
وارد اگلــك يـاكـبر ذنـب الـجنيت         الـكـون مـاظـن يـحـتمل لـذنوبك
بالله مـاتـخجل اتـجـاور لـلحسين         نــاخ ظـعـنك يـمـه ويــا طـنـوبك
شـلون تـجري الـيوم يانهر وتسير         شـلـون مـاتـتقلب اعـلـه جـنوبك
فـتـت الـقـلوب لـطفال الـحسين         ذنـبـك مــن الـراس لـين چعـوبك
لاتگلــي هـم چنـت عـدهم اسـير         حـجز جـيش يـزيد كـل مـصبوبك
وحاطتك الجيوش يمنه ويا اليسار         وجـيش غـطه شـمالك ويا جنوبك
لـيش مـاثرت وفـضت لجل الأباة         وچان بــيـدك تــرفـع لـمـنسوبك
إنـته فـضت شـكثر يـانهر الفرات         غـــرَّگت يـانـهـر حـتـى شـعـوبك
جــاي تـتعذر وتـنفي الـلي جـنيت         لاتـظـن يـمـشي عـلـي مـلـعوبك
أنته مثل الكوفه راسلت الحسين         بـيـن كـتب الـكوفه هـم مـكتوبك
يـانـهـر لامـابگيـت اعـلـه الـعـهود         صــار نـكث الـعهد هـم مـركوبك
حـيف مـاقدرت مـن جاك اعتناك         ومــاأظـن تگدر تـغـطي عـيـوبك
مادرت وجهك لصوب آل الرسول         وچان قاسي ويا الحسين اسلوبك