شرد اگلك يانهر شط الفرات = ماوفيت وهم خنت محبوبك شلون تتنكر لبو اليمه الحسين = وعنه تمنع تحجب لمشروبك إل عطش فت يانهر گلب الرضيع = والطغاة اتهنت بمسكوبك چان واجب يانهر شط الفرات = تحمل لطفل الحسين هدوبك وآنا اگلك خيبت كل الظنون = وبدل ماتضوي عراك غروبك ليش يانهر اقبلت تسگي الجناة = بوجه آل البيت تگفل بوبك وارد اگلك ياكبر ذنب الجنيت = الكون ماظن يحتمل لذنوبك بالله ماتخجل اتجاور للحسين = ناخ ظعنك يمه ويا طنوبك شلون تجري اليوم يانهر وتسير = شلون ماتتقلب اعله جنوبك فتت القلوب لطفال الحسين = ذنبك من الراس لين چعوبك لاتگلي هم چنت عدهم اسير = حجز جيش يزيد كل مصبوبك وحاطتك الجيوش يمنه ويا اليسار = وجيش غطه شمالك ويا جنوبك ليش ماثرت وفضت لجل الأباة = وچان بيدك ترفع لمنسوبك إنته فضت شكثر يانهر الفرات = غرَّگت يانهر حتى شعوبك جاي تتعذر وتنفي اللي جنيت = لاتظن يمشي علي ملعوبك أنته مثل الكوفه راسلت الحسين = بين كتب الكوفه هم مكتوبك يانهر لامابگيت اعله العهود = صار نكث العهد هم مركوبك حيف ماقدرت من جاك اعتناك = وماأظن تگدر تغطي عيوبك مادرت وجهك لصوب آل الرسول = وچان قاسي ويا الحسين اسلوبك