لِگَيتَكْ نَبِعْ وآنا الْيومْ عَطْشَانْ = واعْذَبْ مَاي بِالْدِّنيَه لِگَيتَكْ نِظَرْتِ الْمَاي يجْري وگِلِتْ سُبْحَانْ = سُبْحَانَكْ يَمَنْ تِجْزِلْ عَطِيتَكْ جِسْتِ الْمَاي بيدي لَنَّه قُرْآنْ = وربَّات الْقِيَمْ تسكن ثِنِيتَكْ صِدگ جِزْتِ الْمَلايك وانْتَه إنْسَانْ = تِزْدَحْمِ الْمَلايكْ بارُضْ بَيتَكْ لمَنْ دِسْتِ الأرض ضَوَّيت الأكوانْ = فِدَيَتك يَارَسول الله فِدَيَتكْ الشَّمِسْ تِضْحَكْ تِلالي وتِنْشِرْ الوانْ = ومِنْ شَافه الْگُمَرْ گَلَّه هِوَيتَكْ يَمَنْ بيك الأرض ذبَّت الأحْزَانْ = ولِبْسَتْ ثوب متوشح هَوِيتَكْ ضِحْكَتله السِّمَه مِنْ شَعْشَعْ وبَانْ = تَاج لْراسي يگْلَيبي بُغَيتَكْ نِجُوم الْسِّمه مِنْ لِمْحَت الفتَّانْ = گَاْلَنْ مَسْنَدَكْ إحنه وتِچِيْتَكْ تَغَطَّتْ وَرِدْ والْقِدَّاحْ وِدْيَانْ = مِنْ شَمَّتْ عَبِير الْدِنْيَه رِيتَكْ تِهَاوَت عَلْ الأرضْ مَفْزُوعَه تِيجَانْ = مِنْ حَلِ بْقصورْ وطَافْ صِيتَكْ رِجَفْ كِسْرى وتِزَلْزَلْ بِيه إِيوَانْ = مِنْ شَعْشَعْ سَنَاكْ وضَوَّى بَيتَكْ غنَّتْ طَلْعِتَكْ بَشِّرَتْ رُكْبَانْ = وآنا ويَا الْحِدى بروحي حِدَيتَكْ ياطَبْعِ الْحِلو ومِنْ نَسِلْ عَدْنَانْ = لِگْلَيبي دِوى وبَلْسَمْ شِرَيتَكْ يَاْأَعْذَبْ عِشِگْ سَطَّره ولْهَانْ = بَسّ انْتَ اللِّي لِگْلَيبي مِلَيتَكْ يَاجِسر ودَرُبْ يوصَل الْمَنَّانْ = مَاهَدني الْنَدَمْ لَمَّنْ مِشَيتَكْ شِفِتْ دِينَكْ حِوى ابْمَضْمُونَه الادْيَانْ = إِمَاْمِ وقُدْوَه لِگْلَيبي رِضَيتَكْ بِيدَكْ سَيِّدي الْقُرْآنْ مِيزَانْ = تِطْحَنْ مِنْ يِصدْ عَنَّكْ رِحِيتَكْ خَاب اللِّي جِفَاكْ ودَنَّس أرْدَانْ = تِرْدِيه وتِشِكْ صَدْرَه صِلِيتَكْ والْيِغْمِسْ ايدَينَه بإيدِ شَيطَانْ = ماتُخْطئ ابَدْ رَمْيَة رِمِيتَكْ مَايسْمَحْ أَجِيزِ الْبَابْ رِضْوَانْ = لو شِحتِ الْوجِه عَنَّكْ عِصَيتَكْ نهْرَكْ مِنْ جِرى طَهَّر الأدْرَانْ = راعي انْتَه وقَسَمْ فَاْزَتْ رَعِيتَكْ