طب المدينة واعتلى من عنده الصياح = نادى بشر يهل المدينة امامكم راح طلعن ولطمن بلعويل وعالي النياح = وحاطن يويلي ببشر والدمعة جرية قول النبي يهل المدينة القوم نحّوه = والجهل والشر والحقد من وكره صحّوه وذبحة شنيعة مهجة المختار ذبحْوه = وجملة أنصاره اذبحّت بالغادرية ذبحوا العدى في كربلا سيد الإسلام = واصحابه واهله وما بقى واحد بالخيام غير العليل اليحرس العيلة والأيتام = داروا بهم بالروس مثل الخارجية ظلن بولية كفر شوْصٍفْ جور الأيام = بعد الخدر تامر وتنهي عليها ظلام طبن على ابن زياد وطبن حسرى بالشام = والكل منهم يشتم الهادي ووصيه تتصدق الوادم عليهم وسط البلاد = وتتفرج عليهم وتشتمهم الأوغاد وكانو بيوت الجود تقصدهم الوفاد = بيوت الوحي وجبريل كلْها اضحت خلية ولن صوت يصك مسمع بشر شنهي الحكاية = قلها انطفى في كربلا نور الهداية راحت أولادك الأربعة بعز الولاية = ونالو الشهادة ومنزلة من الله علية وأما البطل عباس محمودة أفعاله = مقدر أوْصِف لكْ عالنهر شنهي أحواله لِتْراب والدم والله ما غير جماله = والعلم و القربة وكفينه رمية واللهْ يأم عباس ذكرهم بحيدر = لمن صرخ بيده العلم زلزل العسكر آلاف كانت بالنهر فلْها وحدر = واملى القربة وماشرب قطرة امية والوى العنان وللمخيم طوّح وراح = والْتمّت عليه العدى باسياف وارماح ومن شافه وسط المعركة خامس الأشباح = طفّح جواده وسَنَد ظهره بظهر خيّه شمس وقمر وتشعشعت منهم الأنوار = عين الله ترعى هالفلك من كيد الأشرار صبوا الموت على العدى بشفرة البتار = وارماحهم لو تعتلي تصيب الثريا صارت الصيحة ورد أبو سكينة المخيم = وظلْ وحده وسط المعركة حوله العدو التم من بعد ماصبّغ أرضْ الطفوف بالدم = وداست حوافرها على جثثها الدنية قطعو ايساره من بعد ماقطعو اليمين = وبزنوده ما فك اللوا وجا سهم بلعين والمصيبة والله بعمد فضخوا لهام نصين = نادى عليه احسين خويه أعظم رزية بعدك يبو فاضل يخوه انكسر ظهري = افتلت يعقلي شوكتي واظلمّ دهري خلني أوديك الخيم يابعد عمري = أهل الخيم يرجون منك خويه جية خلني يخويه عالنهر لي تطلع الروح = الله يعينك يا عضيدي خلني وروح عود وقلبه من الحزن يلتهب مجروح = تلقته زينب جاوب بدمعة سخية قالت ينور العين أنشدك عن كفيلي = وحدك لفيت وما لفى يمك دليلي قلها بعد ذبحي تعوفيني وتشيلي = عينك على السجاد وباقي الهاشمية الأملاك كلهم من بعد ساعة يلوجون = والاجساد كلها مصرعة والخيم يبكون وحسين كلما يون ونة يزلزل الكون = وراح الزعيم احسين ونصاره سوية صكت على الهامة وهلت دمعة العين = لا تدعوني بعد هالساعة أم البنين راحوا أولادي الأربعة وانقتل الحسين = لأنصب عليهم ما بقى عمري عزية تقعد وترسم بالترايب أربعة اقبور = وتذكّر أولاد أربعة أزهى من البدور قاسوا الظما واتذبحوا في يوم عاشور = كلهم قضوا فدوى للحسين الشفية بالله خبروني يفرسان وصناديد = في الروحة بالنسوان كيف اقطعتوا البيد وكيفة بلياكم طبّن مجلس يزيد = ترضوا ولا أظن كيف غيرتكم أبية بالله صدق يولاد من شبت الحومة = كلكم خضب وجهه الحلو بفايض دمومه والسيف والحر والعطش غير رسومه = والشمس تصلي وْهَم حوافر الأعوجية يا جنى قليبي يالرفعتوا مني الراس = كنيّ بالزهرا بالحشر في زحمة الناس تحمل كفوفك يا ضوى عيوني يعباس = و تقدم الشكوى إلى رب البرية يانوار عمري كيف طعم الموت عدكم = وكيفه تحملوا الظما يفتت كبدكم واسياف وارماح العدى تفري جلدكم = وكل ضربة البيكم ترى يولاد بية يولاد كيف اسلي وكيف اتفادى الشجون = وأصواتكم باذني وشخصكم وسط العيون ومن أنظر الوادم على بالي تمرون = ويثور حزني و يشتعل وجدي عليّه ومن أنظر النسوان تبكي حولي وتنوح = ومدامع الأيتام بالخد دوم مسفوح ينعصر قلبي وتطلع من افّادي الروح = واصفق وسف واخمش على خدي بيدية وانت يبو فاضل يبن حيدر الكرار = خليته يلعب بالعدى سيفك البتار والله لو مانقطعت يمينك واليسار = ماتجاسر عليك بعمد نسل الدعية يبني يعز على العطش وصف اصطبارك = أدري بحشاك من الظما تشتعل نارك وآلام عينك بعد يمناك ويسارك = جرحن قلبي ونغصن عيشي عليه تمنيت أنا يمك وأشوفك ياوليدي = حتى أناغي النحر بدموعي وهودي وتتوسد بدال الترب يوليدي إيدي = وأفرش لك اضلوعي بدل حر الوطية طبن خواتك صدق يبني وسطة الناس = وتتفرج عليهم بلا رحمة الأرجاس يبني صدق زينب مشت مكشوفة الراس = بين السكك دارو بهن فوق المطية لله يعين أم الحسن شتْعد من مصاب = مصاب النبي ولاّ الوصي لوعصرة الباب وسم الحسن وبكربلا قلب النبي ذاب = ولاّ بنات المصطفى تمشي سبية يا أم الحسن عذري تفانوا طبق الأولاد = لو عندي منهم ألف ما واحد أبد حاد لكن تفانوا وانقتل سيد الأسياد = حق الشرع يا فاطمة واجب عليه يا أم الحسن يا من قضت حسرى وأسيفة = كل الجرى من أفعال ما يسهل وصيفه أصله ترى غرس الحقد يوم السقيفة = يوم الرحل فيه النبي وانخطف ضيّه من كسر ضلعك يا بتول انكسرت أضلاع = وبلطمة العين انسلب في كربلا اقناع وباسقاط محسن ظل أخوه احسين بالقاع = والنار هي نار الخيم تلهب سرية يم الحسن أصل الرزايا لطمة العين = والباب والنار اللي شبوها الملاعين والمحسن وسحب الوصي والد الحسنين = هذا وفدك أصل المصايب والأذية