يالإسمك مَحَنَّه لقاعنه المِمْحِل = وأول نيه للفلاح من يِشْتِل ياشَدَة ظَهَر .. ياهِمَة الحَاصود = ياجدول عَذِب عالقاع من تِجبِل ياطَرَة شمس ماهزها لون الليل = وياضحكة قمر لو ليللنَّه ايْلَيِّل إسمك غنوه عالأغصان مكتوبه = غنتها البلابل عالهوى لْيِحْمِل إسمك ياعلي سالوفة السُمار = وقصة لهفه بينه مسَجله تْسِجِل وحجاية عِشاقه وأُمنية أحباب = يلبِسْمَك تصيح الروح وتهلهِل خَضَار الروح تبقه ياعلي بكل حين = بلسم إلهَه وهْيَه معلعِله تعِلعِل بكل لَحظه طُبَعتك ياعلي أشواق = حتى بطيفي لهفه ياحبيبي اتْحِل وحتى دموعي مِن تهمل على فرقاك = أحضنهن وادَلِّل بيهن اتدِلِّل نوب القاك لون الضحكه بالشفات = ونوبه فرحة الفلاح بالسِنْبِل ومره عْلَّه الشمس شفتك يبوالحسنين = بخيوط الجلاله ياعلي تِغزِل وبعيني شكثر متزاحمه الشوفات = وبكل شوفه عيني بالمَحَنَّه تْهِل مو عَد الفرايض أوقف لنجواك = بيك ابكل وكِت اتوَسَل اتوِسِّل أعظم آيه إسمك يا أجَل قرآن = وبثغر الجلاله امرتَله ترِتِل مورِفقة رمش لَمَّن يخاوي العين = هذا اسْمَك بروحي صار ظِل الظِل جذاب الوكِت .. غلطان كلمن قال: = مِبْعِد ياعلي ..!! لا والله خِل الْخِل آمنت بوجودك وبعَزم يمناك = يَلْمِّن اِسمَك اجيوش العِده تِبسِل يحتار المَجِد لمن يمر طاريك = والتيجان حَدرَك بالبطوله اتْذِل واقلام المَجِد من يلمس احروفك = تِلْقاها وَحده بالوَزِن تِثقل ياصل المنايه وضربتك تابوت = ومامثلك يحيدر بالمعارك صِل مو مرحب طُبرته ياعلي الكرار = إنتَه للشرك جدلته اتْجِدِّل واقف ياعلي ابَّابك واعرفك زين = مَتخَلِّي لإجاك ابعَتبَة الْمَنْزِل جيتك ياعلي مِنِّ البُعُد شجاي = مو تِدري البُعُد عن حضرتك يِكْتِل جيتك حامل ادموع اليتيم وياي = ودموعه غُصًص تتكسر وتِهْمِل جيتك شايل اونين الثكالى ادموع = بيديني اجْمَعِتْهِن من قبل تِنْزِل جيتك حامل من حسين صرخة صوت = ( هيهات المذله ) شلون ترضه انْذِل؟! مِن أرض الجنوب ارفع إلك شكواي = خَصمَك بالجنوب اتْمَرجَل اتْمرجل خلصن شيعتك وينك يذو الفَقَّار = رِد خيبر يحيدر قلِّي شِمأمِل وين ابنك الغايب حَشْمَه ياكرار = خَلَّص صبره قلِّي ياعلي شْيِحمِل لاعيد لإجانه ورَطَّب الشفات = الضيم شكثر والروح تدري تْمِل تَعَبنَّه الزمان وهَدْنَّه جف الآه = والوَكْت ابصلافه واقف ايْمَثِّل يَمته ياعلي مِن هالهضم نرتاح = ويَمْتى مْن الجروح ابشوفتك نِغْسِّل نِحْيِي مولدك بالحضره ياكرار = ونتوضه إلك من ماي ورد الفُل