صرت حايط عَلَيَّه اْتْسَنَّد الضيم = ينوح الحايط ويبجي عله ضله وحتى الضل يون وينوح مرات = مثل حال الغريب لفارق اهله خنق صدري النحيب وكثر لهموم = البُعُد هدني وعليه طاح ثقله قدرت احمل هضم أشكال والوان = لجن بعد الحبيب اشلون احمله قطع بيَّه حبيبي وعافني وحيد = تسودن عقلي وكل يوم اسئله اسئله بلا شعور وصدري مخنوق = حبيبي لشال عني وين رحله تعبت وتعبت بروحي المسافات = انفتق ثوب الصبر وشلون اشلَّه قصر جلباب صبري بطول لغياب = يبوصالح وصبري منين افصله كبر جرح البعاد وصابه الشيب = تعكز ع الصبر وهم كِسر رجله زرعتك بالدورب الظلمه فانوس = وقبلها انته على الرمشين كحله عليَّه انجمعن الأيام شمات = يعيروني عليك وموش سهله يبو صبر الجبير شأحجي وياك = وصدرك بيه من لوجاع علَّه بعدها امك تون مكسورة ضلوع = ومحسن طايح وجرحه شيحمله اشوفك من تروح الكوفه مخنوق = ومِنِ تْصلي الدمع من دم تهلَّه تناثر حزنك وطشت الحسن صار = يلِم دمعك وذاك الجبد ايْغَسله خلص دمعك ؟ شْيِغَسل نحر لحسين ؟ = ووريده يصيح يالمهدي شْتِقلَّه اشوفك ويه زينب ليلة الخوف = تلم طفل وترد تركض لطفله شعدد من جروحك كلك جروح = وأخير جروحك ينوح عله قبله يفرض الشوق كل لحظه أصليك = واشوفك سيدي بكل صوب قبله الشماته تصيح بيَّه غايبك وين = اشو ماله مكان وضاع وصله اصَبِّر قلبي والبس صبري حزام = لجن دمعي ابد ماينطي مهله اتْعَرفنا مارضينه بيوم ننهان = عجب ترضى لمثلنا بالمذله دخيلك قوم واحصد خسة القوم = تعبنا قوم يبن حماي دخله يريدوني اعوف وهذا هيهات = اْحْلَفِت ماعوف لو بالشوق أصله حبيبي وما أعوفه شماجرى وصار = لون ماي الفرات يلاقي دجله أظل اترجه يوم لبيه موعود = واشوفه يْشِنْ على الطاغوت حمله