عيوني ظلت صوب شوقك سارحه = وروحي بِشْواطي جمالك سابحه ياحبيبي تنازفت اشواقي = فوق نسمات الغياب الجارحه سنين وآنه اْوْياك جُرف ومايه = وتالي ناحت إلنه ذيج النايحه فرقتنه سدود ضيم ولوعه = وظلت الأشواق تنزف طافحه ذبلت جفون الليالي ويانه = لاجن جفوني عله دربك شابحه السنين شعدها بس ويانه = ياحبيبي بالنوايب صايحه قلبي جان ابِّيْن حضنك غافي = حيف سيف البُعد يمك ذابحه ليش دون الناس بس اقليبي = هالسنين ابكل صلافه اتواكحه؟! ماتت ايامي عله حد اطيوفك = وعْله روحي ..دمعي يقرا الفاتحه ياعشق روحي وينبع احساسي = حقه قلب اللي هواك اتصارحه قلِّلي يانسمة هواي وشوقي = يمته ملقانه البعيد انصافحه ؟ حسين ياقبلة حنيني جيتك = أسجد ابمحرابك ابكل جارحه حسين من دمعي توضت روحي = جروح واغسلها بدموعي المالحه حسين كل ليله أشوفك طيفي = وصرت اعِد أيامي كلها البارحه داعبت يحسين طرف عيوني = والخيالات بجمالك رايحه شلون أصبر قللي يامحبوبي ؟؟ = وكفة اسنين الموادَع راجحه روحي جانت طفل تمرح يمك = شلون صارت عن حنانك نازحه ؟ ترضه يانجمه عله خد اسنيني = هالزمان اللي ذبحنه نصالحه ؟ ترضه ياشمسي ويَفَي أيامي = نقول للذباح الله يسامحه ؟ لا حشه ماأرضه بالذل مااطخ = وجلمتك هيهات عندي واضحه تبقه محبوبي لأذوب ابشوفه = وروحي تبقه بيك دايم رابحه خل تلوم بهالعشق عذالي = وخلها تبقه بغيها تِجْتَر دايحه أنتظر بس اعتني لعتابك = سكته أزحف والمدامع فاضحه والطم عله فراقك بجفيني = وعيني من دم الموادع سابحه واعتني لعباسك عله جفوفي = وأقصده مثل الخيول الجامحه وعله أعتابه أوسد روحي = وروحي بجنانه حزينه ورازحه واطبع الأشواق فوق اشفافي = واسرح بذيج العطور الفايحه خادمك يحسين وآنه بجالك = مْجَرَّح بريح الوادع اللافحه جيت أحشمك واروي قاع ابعادك = من فرات عيون ظلت سافحه