حسين ﮔلي شلون اجيك ؟ منين اجيك ؟
ويادرب لِجروحك وظل بيْه معْبَّر ؟
بيا لسان احﭽي !! وياشفه لبﮕت ... تنطق اجروحك
بعد ياحيل يﮕدر
سيدي مِحتار ﮔلي شلون اجيك ؟!!
غير اجيك امْحمل ابتابوت جرحك
ويبﮕه يَم تابوتِي مَلْك الْنوح يفتر
حسين اجيك وعﮕلي بِجنازه أشَيْعَه
وهُوَّه ياعقل لْعَلَى مْصَابك تصبَّر ...!!
مْﭽَفِن الروح ابسواد العاشر افتر

حسين ﮔلي وين اجيك ؟
وانته منثور عْلَّه كُبْر الﮕاع واكثر
خلني اتعانﮓ اْوْياك ابْكِل جرِح
وخلني اتعنالك ابكل الْجروح
واعتبْرنِي جَرِح من حزنَك تِنَثَّر
وخل اجيلك ضعن مقهور وغريب
يلشِلِت بضعونك الأكرام بالبَر
وخل اجيلك (قَهرطفله ) .. ( ومرض طفله ) ... ( ودمع طفله)
وَدَعِتها وبﮕت بس عيون تسهر
ثﮕل هَمها وعَيَّه زيج النوح يِنْزَر
أرْد اجيلك حزن زينب...
ﮔلب أمشي بين أبيات ( الطرماح ) بونين الْحادي أعثر
لو أجيلك تُربه من ﮔاع الْمنيه ؟ ...
تُربه بس اِلْها يلوﮒ الثوب لَحمر !!
حسين جيتك ... دمعه من عامود خيمه بكربله...
سِجدَت ابفسطاطك وْهَم بِيْه تِسعَر
جيت نَجمه بليلة العاشر بﮕت وياك تسهر
جيت جَمره مِن عِطَش دمع الفُرات ...
ومات ذاك الشاطي بالْحر !!
مْره اْجيك اصْياح طفلك ... وانزَع اﮔماط السكوت الْﭽان مَجْمَر
ومره أتعنالك ابندبات خِدَّر
ونوب اجيك اونين (سكنه) ... ونوب اجي بلوعة (حَميده)
لو أجي بشَهﮕة (رقيه) (وجرح ( لكبر ) ؟؟ !!
واحْمل دموعي شَمِع مَحروﮒ ... واخضر
بيا جرح يَحسين اِجيتك ؟!!!
جيتك ابكسرة ظهر وبشاطي احزانك أطيح
أتﭽي بﭽفوف (عباسك) واصيح
حسين ﮔلي شباﮔي أكثر ؟؟!! شْظلِّي أكثر ؟
تْحيرت من وين اجيك
خوف اجي بِجروح جسمَك ... يِنْزِف الذر
شلون للطف حيل وبيْه صدرك تكسَّر
والشمس مكسوره من لَمعة الْمنحر
وبعد هالْحيره أجيك امْغَسَّل ابْماي الْحنين
بلايه رجلين وﭼفوف ...جيت اطوف
جيت احج لك بالحروف ... جرح بحدود السيوف
وصار عنوان الْجرح ...) حَج الْحسين )