ياخويه جيت يم گبرك = يا سور البيت انخبرك بالصار ويجري اعلينه = من جاروا ياخويه بينه *** يخويه جار دهري بيه والايام = ورماني اشلون رميه زيّدت لالام چنت اتمنّه لاچن خابت الاحلام = لون يمك اظل ولا اطب للشام يخويه هاك اخباري = صدگ ما جاك الجاري صرنه نتستر بيدينه = من جاروا يا خويه بينه *** يبو اليمه تشب النار بخيمنه = ومثلها صار يتلاهب جمر همنه وصرنه ويه الزلم ولا ولي يمنه = وهاي اعداك تريد انسير ترغمنه يخويه شوف رضعانك = اخذها خوف عدوانك واعداك الرادت تسبينه = من جاروا يا خويه بينه *** اريد اشكيلك اهمومي ابگلب مالوم = وابث الامي واحزاني وابث اهموم واخبرك هالخدر اصبح اثر مرسوم = بعد ماحرگوا اخيامك هذيچ الگوم دريت اشصار يبن امي = بگيت ابنار من همي وانادي الطاحت چفينه = من جاروا يا خويه بينه *** صعب فرگاك يبن امي صعب فرگاك = اتمنه لون عمري اظل وياك ولالحظه اعوفك ياشهم وانساك = لاچن هالحتم فرّگنه واتناساك يبن امي چيف انساك = يصل الصيف بحماكم اصبح عكس اللي اتمنينه = من جاروا يا خويه بينه *** رحنه الشام والشّمات بينه اتدور = تعاين من على الهزّل ابثغر مسرور وراسك يالذي بالطف جسم منحور = اگبالي يشع من هيبته بالنور يمن بالنور ايلالي = تشوف الجور اگبالي وحنينه الگبرك حنينه = من جاروا يا خويه بينه *** نرد اهنا يهلنه ونرجع من الشام = بعد ما شفنه يامظلوم هالالام نعمّر يم ضريحك للاهل اخيام = لاچن ظني ما تتحمل الايتام بنينه دار بالحومه = وبدليلي نار مضرومه والگبرك كلنه اتعنينه = من جاروا يا خويه بينه