زينب تحﭼي و الزهرة تسمعها ابدمع همّال=يا يمّه مصايبنا ما مرّت على أي بال زينب (عليها السلام) أريد اشكي لﭻ اهمومي يا يمه او ﮔعدي احذاي=عطش لحسين في ﮔلبي ما يطفيه شرب الماي وحيدة ابهالحرم ظليت ولا واحد بﮕى وياي=او هذي الليلة يا يمه ما مرت مثلها اليال ثلاثة كنا في حضنﭻ علينا ابعطفﭻ اتدارين=و لا مر أبد في بالي يفرﮒ يا بتولة البين حسن بسموم جعدة ايذوب او هذا اعلى الترب لحسين=يظل مدة ثلة ايام بعد ما تنطحن لوصال يمه اشلون ما كنتي معايه ابساعة الهجمة=أدافع عسكر الظلام ولا منهم بدت رحمة خيالﭻ كان في عيني و ذكرت العصرة و اللطمة=ذكرت الباب آه يلباب ﭼم فتّح علينا اهوال كواكب عالترب و اشموس غابت في ظهر عاشور=يم الحسن بالميدان سحﮕت خيلهم لصدور و حبيب المصطفى الهادي راسه اعلى الرمح مشهور=شمِس و ابكربلا انكسفت يا يمه ابوسط لرمال الزهراء (عليها السلام) يزينب يا عقيلة آل هاشم جيتﭻ ابلوجاع=نسيت اللي جرى اعليه نسيت اللطمة و الأضلاع وصلت الكربلا لكن يزينب فاتني لوداع=دهتني فاطمة الكبرى تنوح اعليكم ابولوال يزينب و العذر منﭻ مصدر هالونين امنين=أسمع ونّة بالحومة يزينب ﭼانﭻ اتعرفين صاحت و الدمع همال هذا اونين خويه حسين=عطشان العدا ذبحوه و جسمه بالترب ما انشال إجت زينب مع الزهرة لعند الجسد يا ويلي=و من شافت ولدها حسين صاحت آه يمقتولي بعد ذبحك يبو السجاد دايم بالحزن ليلي=أظل انصب مناحة اعليك و اصفﮓ يمنتي ابلشمال