الزهراء و أم البنين (ع) للشاعر: حسن الحمراني (الفائزي نبطي) أم البنين تصيح يا زهرا الزﭼية=مأجورة يم حسين بهلال المنيّة أم البنين (ع) الليلة يا زهرا الحادي هل علينا=و بهجة فؤادﭺ طاردينه امن المدينة و صارت حزينة الدنيا لجله يا حزينة=و امست علينا اديارنا ظلمة و شجيّة أخلى ادياره و للمنية بالضعن شال=طالع مع الشبان و النسوة و لطفال مظلل الدنيا ابهيبته و ما يحصل ظلال=و اصبح يريد الغوث و هو غوث البريّة الليلة يم حسين حادي هل بالاحزان=و حسين عايف من أجل كربلا الأوطان وجعان يا زهرا و عليه الكون وجعان=وا حسرتي و بتحوط به أجناد اميّة الزهراء (ع) و الا الﮕبر متحرك ابزفرات و ونين=بس عاد هيجتي الحزن يا أم لبنين تخبريني عن لحسين و آني أدري بحسين=ماشي ابضعنه و مشيته للغاضريّة رايح ابضعنه الكربلا و ما ليّه ردّه=تفنى ارجاله و يبﮕى بين الﮕوم وحده و يتجدل و حر الثرى ياكل ابخده=و مِن ينعدل ظهره تﮕلبه الأعوجيّة عندي خبر معلوم من جده الهادي=تتلايم ابطف كربلا اعليه الأعادي ايﮕطعون نحره و صدره اتدوسه العوادي=و يبﮕى ثلة ايام مرمي اعلى الوطيّة و ليكون يم عباس يبﮕى فلذتي حسين=حاير براضي كربلا و ما عنده اعوين ﮔالت يزهرا لا ايسموني ام لبنين=لين ابخل اعلى حسين بولادي سويّة أم البنين (ع) أفديه بعبدالله و عثمان اويا جعفر=و عباس راعي المرجلة الليث الغضنفر و لو عندي أكثر منهم اعطي حسين أكثر=و كل هذا ما أطلع من احﮕوﮔه عليّه