تـعـالي الـيوم يـم عـباس         شـوفـي اولـيـدچ الـغـالي
فـارگنـي وكـسـر ظـهري         افـــراگه وحــرگ دلالــي

يـلـيتچ حـاضـرة ابـهـاليوم         يـــم عــبـاس وتـشـوفين
بـعد مـا طـاح أبـو فـاضل         وشـحالة عـضيده حـسين
جـيـت الـمصرعه وشـفته         عـلى الـشاطي بـلا چفين
وصـرت ابچي عـلى حـاله         وهــو يــبچي عـلى حـالي

لــــو كــنـتـي سـمـعـتـينه         يگول ودمــعـتـه ابـعـيـنـه
يـخويه اعـلى الثرى خلني         ولا اتــوديــنـي لـسـكـيـنة
أخــاف اتـشـوفني وتگول         يـــا عـمـي الـوعـد ويـنـه
مــــــا أگدر أرد لــخــيـام         واسـمـع ضـجّـة أطـفـالي

أذكـــــر يــــوم مــيــلاده         أبــويـه الـمـرتضى شـالـه
وطـالـع فـي جـماله زيـن         ودمــعـه ابـوجـنته سـالـه
وكــلام ابـعـينه واچفـوفـه         بــعـد مـــا طـالـعه گالــه
وكـــلام الـوالـد ابـهـاليوم         كــلــه صــايــر اگبــالــي

گال الـــوالــد اچفـــوفــه         بگطعوها ويفضخوا الراس
واذا طــاح ادركـه وشـيله         لا بــخـيـولـهـم يـــنــداس
وانــا ابـهـاليوم يـم لـبنين         أصــــــرخ آه واعـــبــاس
وتعالي وشوفي يم عباس         حــال ابــنچ دهــش بـالي

لــو شـفـتين يــم لـحزان         وضـع الـلي شـعل حـزني
ابـحـضـني راســه خـلـيته         لـكـن شـالـه مـن حـضني
وگلّــي راســي لا اتـشيله         وعـلى وجـه الـثرى خلني
رخـصت الـغالي لـوجودك         وغـلاتـك مــا أحــد غـالـي

إذا مـــات الــولـد گالـــوا         إلــى أمــه الـولـد مـولود
لـكـنّـه الأخـــو لــو مــات         يگولـــون الأخــو مــفگود
وانـا مـفگودي يـم عـباس         مــثـلاتـه مــهـو مــوجـود
واذا راح الأخــــو يــــبگى         مــكـانـه لــلأبــد خــالــي

مــــا تــــم لچ ولا واحـــد         يـــــم الأربــعــة لـبـنـيـن
گضــوا مــا بـيـن مـتـعفر         وبــيـن امــتـرّب الـخـدين
لــكـن طـيـحـة الـعـبـاس         كسرت ظهر اخوه حسين
ومـثـلاتـه أخــو مــا صــار         مــــن أول ومـــن تــالـي