مـشـتاك الــك يـا وطـن مـشتاك لـلاهوار         يـا عـراقي يـاابو الـنخل والسعف والجمار
مـشتاك انـه لـدير تـي و لـصحبتي الاخيار         الـعماره ديـرة هـلي كَـضيت بـيه أ أطـوار
و لـلبصره روحـي هوت وصفناتي بالعشار         ومـشـتاك أضـل لـلنجف و لـحيدر الـكرار
لـبغداد روحـي تـصد والـكَلب عـد ذي قار         لاهــل الـسـماوه احـن كـلهم وفـه وايـثار
بـديـالى اكــل ثـمر واكَـطع مـن الاشـجار         بــا لـكـوت جـنـي سـبحت وبـمية الـثرثار
بــا لـحله جـني اكَـعدت و اتـغزل بـعشتار         لـلحدباء روحـي تـصد و الـموصل وسنجار
بـعراكَي هـايم صـرت مـن زاخو حد الفاو         خـلـيتني يـا وطـن عـاشك واكَـول اشـعار
حكَي من افاخر وطن موبيدي هل الافكار         تـنـزل عـلـيه غـفـل و تـتـكشف الاســرار
مـن اسـمع الحسجه شعر بكَلبي توج النار         أذكـر مـضايف هـلي و اصفن وضل محتار
غـرافه مـردي وشـبج و اغـرف وي الـتيار         مــوال أ صـدح حـزن يـفطر كَـليب الـمار
وركس المردي بجرف وانزل واسير سيار         بـسد الـصريفه انـطرح نومة فيافي كَصار
وافرش بواري الكَصب وانشر البردي كتار         وتـلـتم عـلـيه الـربع ضـيف وصـديج وجـار
مـسموط نـاكَل سمج والقوري مايه الفار         وبـا لـليل نـسمع غـرف مشحوفنه الحدار
وتـبـدي عـلينه الـزلم ويـتسامرون سـمار         وتـبـتشر كـل الاهـل مـن يـجهب الـخطار
نـسكَف سـمج بالكَصب والخبز ذاك الحار         طـابـك خـبـزنه تــرف يـنـوكل هـيج كـفار
نـشـرب حـلـيبه الـصبح وسـياحنه بـزنجار         تـحـتومه نـاكـل خـبـز و رصــاع بـالامـرار
لـوكس ولالـه و بـطل نـشعله كـلهه انوار         فـانـوصنه مـشـعتل دوم و يـضـل شـنـيار
مـن شـيل هـم لـلوكت و الليل عدنه نهار         نـسولف سـوالف و فـه لاحـقد عدنه وثار
ديــن ورجـولـه و كــرم نـاخـذه مـن كـبار         كَـربـك صـعـب يـاوطن والـبعد عـنك عـار
بـيك الـظلم مـنتشر و سـيف الـظلم بـتار         هـيـجت بـيـه الـجـرح وَأذكــر الــي صــار
كـثرت هـمومي عَـليّ والـعكَل مـني طـار         الـصـار مـايـنوصف مـن عـفنه ذيـج الـدار
دولاب فـرنه الـوكت وطـبع الـوكت غـدار         راحت مضايف هلي و ماكو بصريفه هطار
مـوحش مـضيف السلف ونترس كله غبار         صـبخت ديـرة هـلي و بـيه الـهواى طشار
تـسودن عـلينه الـوكت لـمن اجتنه اشرار         بـوكَه أجـونه الـبعث و الـشعب بـيهم حار
لا هـلـه بـيـه الـبـعث خــل الـضـمير نـدار         بـاعـت عـكَـله الـزلـم بـالـفلس و الـدينار
فـلـوس كـلـهن طـبع والـفين كـل دولـلار         عـشنه بـمجاعه وكَـحط وارتـفعة الاسعار
شمشوم حط بالسلف و خله الزلم طشار         أعـدام نـص الـشعب و الباقي عاش انذار
جــاع الـشـعب وانـذبح وصـاحواصغاركبار         خـلـصـنه يـابـوالـحسن يـاحـيـدر الــكـرار