قصيده شعريه شعبيه بمناسبة ميلاد أبي الفضل العباس(ع) يلساسك العز والمجد= واصل الكرامه گاعك بذره وتفوح ابمرجله= جَلِّ الذي صَنَّاعك وموعجبه لوفاح الوفه= لَن حيدره زَرَّاعَك صُبح الشهامه لوطلع= ساسه شمس مِطلاعك عباس ياكل المجد= ريح وحضنها اشراعك جود وشيم عزم وحلم= طيب ووفه أطباعك وبمولدك هلهل علي= عُوْدَك اوباس اذراعك بَوَّس يمينك ياگمر= ويسارك وشد باعك بيدينه من شالك علي= صاح المجد بسماعك چن حيدره شال الفلك= والكون بين اضلاعك يلما مثل شمسك شمس= ويلما مثلها اوجاعك ودون اللبن يابالفضل= بسس غيره چان رضاعك يَمْثَلِّم حدود الزلم= ومَلْك المنايه طاعك لو أحچي عنك ياگمر= أدري اظل ابحيره وادري الشعر موش المهم= نظمه وحسن تسطيره شخصك صعب من ينوصف= ومنهو لوصل تصويره عگلي على حروفك صفن= وْچَل وتعب تفكيره كل حَرُف مِنِّ سْمَك صُبَح= طلسم صعب تفسيره العين عين التضحيه= وحاجبها چان الغيره والباء بحر من الشيم= وصعب البحر تدويره والألف آيات الفضل= كل آيه علم وسيره والسين سيف الله صرت= والطف وجب تذكيره يلوصفك ايْحَيْر الشعر= وضاع الشعر تعبيره يا بالفضل حگه القلم= لو ووگف ابتحييره مِتْلَبِس ابْشال الخجل= ومتلعثم التقصيره لن إسمك ابطرف السمه= يهدي الفلك تنويره لو أنطي عيني لكربله= يابالفضل واترقب واسألها عَنَّك ياگمر= شتحچي عَنَك يمضهضب ألگه اللسان بشيمتك= يتحير ويتعجب يگللي لون ردت الخبر= إخذ الخبر من زينب تحچي عن اوصاف الگمر= وِتْخِبرَك بكل مطلب عباس چان من الزغر= للغيره والعز مضرب بعيونه لمعت غيرته= ومثله ايْعَرِف لِمعاتب نوماسه يالسائل شمس= ولالاتظن تتحجب عن غيرته تحچي الخيم= بلسان نار لتلهب وبيثاره خل يحچي النهر= ريت النهر يتنضب حتى الفرات لحالته= نادى يعباس اشرب زلزال ويفوج النهر= لمن أبوفاضل طب رَوَّه الفرات بشيمته= من دمع عينه لينصب عن صولته دونك خبر= سيفه سعير مجرب صحراء بسيوف وزلم= نسور الشرك تتوثب وبن الصميده من وگف= ضاگ الفضاء الأرحب فر بيها چن فر الرحى= مية هلا بخي زينب لوما الله چا شال النهر= ووچاه فوگ المنكب ضنوا علي بالطف حضر= ومنَّه الجمع يتهيب ضنوا أبوفاضل علي= ذاك اللي شاطر مرحب ماميزوا مافرقوا= بين الإبن.. بين الأب