يـحـسـين ويـــاك انـجـاهـد         يـحـسين والـمـوقف واحــد
لـلـعـالم نـكـشـف غـايـتـنه         هــيـهـات انـغـيـر فـكـرتـنه

انــصـارك احـنـه وصـمـمنه         ويـــاك انـجـاهـد يـحـسـين
نــتـأمـل مــيـعـاد الــثــورة         ونـنـتظر مــن كـبل اسـنين
هـالـموعد حـانـت سـاعـاته         وصـار الـموقف بـين اثـنين
بــيـن الــنـار وبـيـن الـجـنة         بـيـن الـدنـيه وبـيـن الـديـن
مــنـريـد هـالـدنـيـه ابــذلـه         مــنــريـد عـــنــك نـتـخـلّـه
مــن اجـلـك نـتـرك دنـيـتنه         هــيـهـات انـغـيـر فـكـرتـنه

بـتـكوين الإنـسـان الـمؤمن         تــتــكـون أربــــع أركــــان
لــو ردنــه انـعـددهن ذمــه         واحـسـاس وذات ووجــدان
والــمـا يـمـلـكهن مــا نگدر         يـحـسـين انـسـميه إنـسـان
بـهـذا الـمبدأ جـينه ونـشرح         لــلـوادم مـعـنـى الإيــمـان
لـلـنـاس فــكـره انـوضـحها         لـلـنـاس بــالـدم نـشـرحـها
بــس الــدم يـضمن عـزتنه         هــيـهـات انـغـيـر فـكـرتـنه

عـزتـنـه انـشـيـدها ابـدمـنه         ومـنعيش ابـظل الـطاغوت
انـقـدم لـلدين اشـما نـملك         يـحـسين ومـنـهاب الـموت
هـالفرصه اشـلون انـضيعها         فـرصـتنه وهـيـهات اتـفوت
بـالـمـنحر نـرفـع صـرخـتنه         وصوت المنحر أوضح صوت
صــرخـات تـتـحده الـظـالم         صـرخـات وتـصـحي الـوادم
بــالـدم انـتـرجـم صـرخـتنه         هــيـهـات انـغـيـر فـكـرتـنه

يـحـسين أنـصـارك تـدريـنه         جـيـنـه ابـلـهـفه وبـايـعـناك
واتـركـنه الـدنـيه ومــا بـيها         لـجلك وامـشينه ابـمسراك
أتـعـنينه وغـيـرك مـا عـدنه         انـعيش اوياك انموت اوياك
انـــقــدم أرواح ومـنـبـالـي         ولا تـرهبنه اجـيوش أعـداك
هـالـيـوم نـرخـصـلك دمـنـه         هـالـيـوم خـصـمك مـيـهمنه
گبـلـك خـل نـدخل حـومتنه         هــيـهـات انـغـيـر فـكـرتـنه

آلاف الـعـسـكر مـجـمـوعه         تـريد اتـصب اعـليك الـجور
بـيا قـانون انـعوفك وحـدك         ابـيـا اعــراف ابـيـا دسـتـور
گبــلــك نـتـقـدم بـالـحـومه         وانــقـدم يـحـسـين انـحـور
يـــا قـلـعـة امـتـنـه الـحـره         احـنـه ابـحدك نـصبح سـور
ويـــــاك آمــنـنـه ابــحـبـك         ويـــاك مـــا نـتـرك دربــك
يـــا راســم مـنـهج ثـورتـنه         هــيـهـات انـغـيـر فـكـرتـنه

هــذا الـيوم وهـاي الـساعة         وهـاي الـلحظة وهذا الحال
گبــل اسـنـين انـفكر بـيهن         وانــعـقـدت بـيـهـن آمـــال
لاحــــت آفــــاق الــحـريـة         الـتـضـمن تـحـرير الأجـيـال
والـعـزة الـلـي نـحـلم بـيها         اتـكـلفنه انـخـوض الأهـوال
مـنـعـوف مـبـدأنـه الـخـالد         مـنـعـوف نـهـجـك يـالـقـائد
بــحــدودك نــرفـع رايـتـنـه         هــيـهـات انـغـيـر فـكـرتـنه

يـحـسـيـن أرواح انـضـحـيها         أرواح وعـالـمـوت اتــحـوم
والــحـال الــلـي أثــر بـيـنه         انـفـكر بـمـرك يــا مـظلوم
لـو رحـنه اتـظل ابـلا نـاصر         مــن تـسـتفرد بـيـك الگوم
ريـــت الأرواح اتـعـود الـنـه         وهم انضحي وننطي ادموم
واشـلون مـن اتـظل وحدك         واشـلـون لا نـاصـر عـنـدك
رغـم الـحاله الـلي فـجعتنه         هــيـهـات انـغـيـر فـكـرتـنه

نـتـصور مـن اتـظل وحـدك         واتـحـيطك خـيـل وفـرسان
تـهتف هـل مـن ناصر ينصر         هـالـصـرخه اتـهـز الأكــوان
احـنـه وبـالـمصرع نـسمعها         وعـــالگاع اتـمـوج الأبــدان
نـتـأسـف مــا نگدر نـنـهض         لــو حـاطـت بـيك الـعدوان
شـيفيد مـن نـسمع صـوتك         شـيـفيد مــا نـدفـع مـوتـك
لـــو نـحـيا انـجـدد صـولـتنه         هــيـهـات انـغـيـر فـكـرتـنه