طــاح ابـو فـاضل و راح يـغرّد ابـصوته الـبشير         شـمـل عـدوانـك تـشـتّت قَــرّة عـيـون الأمـير

قــرّة اعـيـونك عـمـيد الـجيش بـالميدان طـاح         بـيـرق الـعزّ انـكسر مـنهم و عـزم حـسين راح
هـسّا مـن بـعده يـظل كـالطّير مـكسور الجناح         مـنـكسر ظـهـره يـديـر الـعين مـعدوم الـنّصير

وقــف مـعدوم الـنّصير حـسين و دمـوعه تـهل         صـاح يَـعْضيدي وقـع وَسْـفَه على القاع الحمل
بـعـدها ابْـتَـنواك سـكـنه و بـيدها بـعده الـطّفل         و جـان اخـبّرها اوقـعت بَـحوالها تدري اشْيصير

حـزام ظـهري و يـا كفيل ايتامي اشبيدي عليك         بـطّـل ونـيـنك و قــوم اخـتـك تـراهي تـرتجيك
هـذا رمـحك هـذا جودك وين سيفك وين ايديك         فـتح عـينه و ظـل لـخيّه حـسين بـزنوده يـشير

يـشـير لـعْضيده بـزنود مـقطّعه مـنها الـجفوف         سهم البعيني دشلْعه و اغسل الدّم جان اشوف
أنـظرك نـظره قـبل مـوتي يَبو سكنه العطوف         ملتظي وروحي افْغَرَت يحسين من لفح الهجير

قـعد عـد راسـه ايـتلوّى و رفـع خدّه مْن الثّرى         و رد سـحب راسـه الـشّفيّه و بـالتّرايب عـفّره
ايـقلّه جـثْتك عـقب سـاعه اتظل رميّه ابهالعرا         تـشيل خدّي مْن الثّرى و تالي يظل خدّك عفير

لا تـودّيـنـي الـخـيـمه يـــا عـضـيدي و مـهـجتي         يـنـصدع قـلـب الـوديـعه بــس تـعـاين حـالـتي
لا تـفـارقـني تـــرى قــربـت يـخـويـه مـوتـتـي         جـــذب ونّـاتـه و غــدت عـيـنه لـخـيّه تـسـتدير

فــارقـت روحــه و ابــو الـسـجّاد مــدّد جـثّـته         و غـمّـض عـيونه و عـلى الـخدّين هـلّت دمـعته
أيّــس و قــام و مـثـل مــا قــال قـلّـت حـيلته         و رجــع قـاصـد لـلخيَم يـجذب الـونّه مـستحير