قــوّض أبـوالهادي ظـعونه مـن الـمدينه         بــغـداد قــصـده و ودّع عـيـاله و بـنـينه

ودّع عـيـاله وقـبر جـدّه ومـدمعه يـسيل         ومـرّغ خـدوده عْلَى القبر ويصيح بالويل
عـنّـك يَـبـو ابـراهـيم لازم قــوّه انـشيل         دوم الـدّهـر يــا مـصـطفى جـايـر عـلينا

ودّع الـهـادي وقــال هـذا الـخلف بـعدي         هــذا الامــام الـلّـي يـشيّد شـرع جـدّي
وحــده يـظل والـلي عـليه يـزيد وجـدي         لـلـسّادسه يــا حـيـف مــا بـلغن سـنينه

سـافـر عــن اوطـانـه مـلاذ الـهاشميّين         خـلّى الـمدينه اتموج جنها سفرة حسين
يـمشي وعـلى راسـه يـحوّم طاير البين         مــجـبـور و الــعــدوان قـــوّه جـالـبـينه

بــس مــا وصــل بـغداد عـدوانه تـباريه         اسـهـام الـمنيّه بـالسموم اتـوجّهت لـيه
بـالـسّم قـضـى ونـالت مـطالبها أعـاديه         مـرمـي ثـلاث عـلى الـسّطح مَـيقاربونه

مات الطّهر واخفوا على الشّيعه اخباره         و يــدرون مـحّـد يـنـتغر يـطـلب ابـثـاره
ظـل بـالعرا والـنّاس كـلها فـي انتظاره         و الـمسك لَـذفر فـاح مـن نسل الأمينه

و نـادى لـمنادي والخلق فرّت بلا شعور         و بـغداد مـن كـثر الـصّوايح رادت اتمور
شالوا سريره ابن الرّسول بْلَطُم لصْدور         عِــدْ جــدّه الـكـاظم ابـضجّه امـشيّعينه

شـالوا الـجنازه وشيعته ضجّت الصّوبين         وفــرّت رجـاجيل ونـسا تـصفج الـجفّين
راح الــجـواد و راح ســـور الـهـاشميّين         بـديـار غـربـه وكــل هـله مـا يـحضرونه

والـقـبر مـطروح الـجسر جـابوا حـفيده         خـلّـوه يـمّـه و صــارت الـضّجّه شـديده
الــهـادي إجـــاه و نــزّلـه بـالـقبر بـيـده         اُو وراى أبـــوه ابـحـفـرته وردّ الـمـدينه