يـحـلـيلة  الــهـادي  دنــت  مـنّـي  الـمـنيّه         و بـاجـي حـنـوط الـمصطفى حـضريه لـيّه

هــاج الـحـزن بـيـها و هـلّـت دمـعة الـعين         يـمـها دنــت وتـصيح يـم الـحسن وحـسين
هـالـيوم  حـالـج زيــن  يـاسـتّ  الـنّساوين         فـالِـج  عـسـى  فــال  الـسّـلامه  يـازجـيّه

قـالـت  لـهـا  حــان  الـوعد  لـبّي  جـوابي         وجـيـبي يَـأَسـما  بـالـعجل  طـيّـب  ثـيـابي
وسـلّي الحسن وحسين من فجعة مصابي         بـتـصـير  مـيـشـومه  عـلـيـهم  هـالـعـشيّه

مــن فـراشـها نـهـضت ومـنها الـدّمع نـثّار         تـعـجن  وتـتـلوّى  وطــب  حـيـدر  الـكرّار
قـلـها عـجـب مـنّـك يـبـنت احـمد الـمختار         شـغـلـين  لـلـدّنـيا  اشـتـغـلتي  هـالـمسيّه

قـالـت أريــد اغـسِـل بـناتي يـاضيا الـكون         و الـخـبز  بـاجر  خـايفه  اولادي  يـجوعون
أولادي يـحـيـدر عــقـب عـيـني لايـضـيعون         مــن  بـعـد  ابـويـه  عـايفه  الـدّنيا  الـدنيّه

تـقاسي بـعدنا مـن الـعذاب أشكال والوان         تـلقى الـبغي والـجور مـن عصبة الشّيطان
تـغـلي  عـلـيك  اقـلـوبها بـأحقاد و اضـغان         دقـعـد  سـويـعه  واسـتمع  مـنّي  الـوصيّه

بـيـدك  تـغـسّلني  أريــدك  يـاحـما  الـجار         وتشوف ضرب امتوني وضربة المسمار    
أولادي  و بـنـاتـي عـيـنـك عـلـيـهم يـكـرّار         يـشـوفون  مـنّـي  الــدّار  يـاحـيدر  خـلـيّه

خـفـيه اطـلـعوها جـنـازتي ودفـنوني بـليل         ومـاريد احـد مـن هـالأعادي نـعشي يشيل
و مـلـزوم  بـالـتّزويج  يـامـخدوم  جـبـريل         بــوصـيـك  لاتــدخــل  مــكـانـي  أجـنـبـيّه

بـعـدي حـسـن وحـسين مـاينوصف هـمهم         يـنـفـقد جـدهـم بـالامـس و الـيـوم أمـهـم
راح الــذي يـضـمهم لـعد صـدره ويـشمهم         ومــن  بـعـدنا  مـتـصير  عـيـشتهم  هـنـيّه
والله يَـزهرا مـن هـضم ضـلعك الـمكسور         بـدموم  تـجري  ادمـوعنا و اقـلوبنا  اتـفور
والـلـي تـشـب نـار الـمصاب ايّـام عـاشور         يـطـلب مـن حـسين الـرّضا و مـنّج عـطيّه