المستهل : من مركز اشعاع الثوره = تصريح ايلائم كل فتره واضح مضمون التصريح = كلمن عادى حسين ايطيح **** 1 قرينه اشكد مواقف كتبت الأ قلام =بدءاً من اميه الحد عصر هدام ياما إعله الشعوب اتفرعنت اصنام =اوجبال اتغيبت واتعملقت اقزام أول ماتباشر تصدر الاحكام =ممنوع ابمحرم ترتفع أعلام لأن هذا الشهر ايامه مو أيام =شعائرهن حجر واعروشهم من جام بس وين اليتلاحك عمره =اويتعنه ايشم عطر الحضره اويسمع اصوات التسبيح = كلمن عاده حسين ايطيح *** 2 شعار اللي ترفعه الدوله مو مقياس =وشعارات اشكثر مخدوعه بيها الناس مثل ماخدعت العالم بني العباس =(ابثار حسين) تدري يهيج الإحساس اولمّن هيمنت عالسلطنه الارجاس =تعدّت ْ عالضريح اوهدمته امن الساس لجن شارة ضريحه او الله فوك الراس =ذلتها المغول اوكل مجدها انداس والما راعو حق العتره = ماظل واحد نندل كبره ظّلام اوذرتها الريح = كلمن عادى حسين يطيح *** 3 حكومات العرب معر وفه كلها اذناب =اوندري السلطوها اعله العروبه اجناب يتوجون الملك بس مو ملك كصاب =الف سياف عنده اللي تكص اركاب او الف (مفتي الديار) اتكض عليه الباب =تصغي الكل اسم منه الملك يرتاب (احسين او كربلا) بالطاري ماتنجاب =والينصب عزاءه تهمته الارهاب مايرضون اعداه انذكره= للعالم مفهومه الفكره ماتحتاج الكل توضيح =كلمن عادى حسين ايطيح *** 4 عرفنه الطف قضيه مو قصص واخبار =اوتجارب ناضجه بيها العقل معيار للرايد يأسس دوله ماتنهار =يبحث عن ثوابت نهج ابو الاحرار دين الدوله ذمه ابركبة الاخيار =اومن حقه الشخص يامعتقد يختار اومن حق كل شخص بالدوله يملك دار =ترى الحرمان منجم يصنع الثوار كل حاكم مايحسم امره =ويفكر بالناس الفقره حقها الناس بوجهه اتصيح = كلمن عادى حسين ايطيح *** 5 كبل جان ابلدنه اشكد ظلم واجحاف =اوطوامير السجن محجوزه للاشراف تغّير كل وضعنه بس بعدنه انخاف =جديده التجربه او محتاجه ناس انظاف محتاجه الرسالي الواضح الشفاف =وللصارو ا ضحايا ايعا ين ابأنصاف نخاف امن اليجي اويصعد على الاكتاف =او معروف الوصولي ابياوكت ينشاف وكت الحج وايام العمره =مانحسب راح اجم مره واقع هذا اومو تجريح = كلمن عادى حسين ايطيح من مركز اشعاع الثوره