لو نِشَف دمعك على مصاب الضلع         إعـصر جـفونك وخـل تـنزف دمـه
وخـلـي بـالـهم نــوح گلـبك يـرتفع         وصـيـح مـا نـنسه مـصيبة فـاطمه
دمـعة عـيونك سـحابه من الغضب         جـمـر تـمـطر عـل مـظالم نـاقمه
وهـذي حـسرة مـهجتك لفحة لهب         تِـرهب عـروش الـطغاة الـمجرمه
صـارت الـدمعه عـلى مـر العصور         صـرخـه بـوجـوه الـعُـتاة الـغاشمه
لـو جـرت شـبه الرصاصه من تثور         مـنـهه تـتـراجف گلــوب الانـظـمه
لا تگصّـــر بـالـدمـع مـهـمـا جــره         ولا تــخـاف شــمـا تـلـوم الـلايـمه
واذكــر مـصاب الـوديعه الـطاهره         واشـعر بحسرة گلب حامي الحمه
يــعـثـر ونــيــن الامــيــر بـعـبـرته          صـابر اعـلى الـغيظ والهم كاظِمه
شـاف صـوره عـن مصابه وطبرته         وصرخه من وحي المصايب قادمه
شـلـون حـرگوا بـابهه بـنار الـحقد         بـاب وحـي الله بـحقدهم مـضرمه
شلون بالعصره انكسر ضلع المجد         وانـحـنت لـمصيبته ضـلوع الـسمه
شلون طاح اجنينهه بحجر الحتوف         بــدال مـهـده بـمـهد آجـاله ارتـمه
ونـسِبت زيـنب گبـل يوم الطفوف         والــخِـدِر شـافـت لـهـيب مـخـيّمه
والـحـسن أصـبح گبـل سـمّ الـغدر         چبــدتـه بـسـمّ الـحـزن مـتـهشمه
والـحـسين وگلـبـه بـالـهم يـستعر         مــن گبـل مـا يـسعر بـنار الـضمه
واحـنه ويّـه حـسين حـاربنه الـدهر         ومــا غُـفـت أمـواجَـه الـمـتلاطمه
وصـار مـن يوم الضلع حادي القدر         يـحـدي بـينه مـن مـصيبه لـموزمه
وعِـشنه ويّه الفاجعه بطول الزمن         اوظــل حـزنّـه ومـا تـغيّر مـوسمه
مـن وطـن تـاخذنه دمـعتنه لـوطن         اوصُـفَت عـنوان لـعقيدتنه اوسـمه
مـا نـبطل الـنوح والـعبره الـتسيح         اولا تـطـيـب جـروحـنـه الـمـتـألمه
والـلـي يـسأل عـن هـويتنه نـصيح         إحـنـه عـشـاق الـحسين وفـاطمه